SHILLONG: Shillong songjinmao CCTV camera-rangko chatahani gimin da·o ramarango niam pe·giparangna Shillong Police, e-challan-rangko on·na man·gnok.
Kobor on·timgiparangni u·iatani gitade, Shillong Smart City-ni ning·o chatgipa CCTV camera-rangko da·o police-rang, ong·gija dakgipa kamrangko nirikkina jakkalenga aro ramarango niam pe·gipa garirangni registration nombor-rangkoba nina man·engaha.
“CCTV camera-rangko chatahani gimin kamrangko name ka·na man·engaha aro bakan, ramarango niam pe·giparangnaba e-challan-rangko on·na man·naba dongaha,” ine kobor on·timgiparang parakataha.
Ia kamo Intelligent Traffic Managenment System (ITMS), Shillong Traffic Police-ni seokgimin junction-rango ge 20 Automatic Number Plate Recognition (ANPR) camera-rangko chataha.
City Surveillance System-ni ning·o ge 328 CCTV camera-rangko chataha aro ianoni ge 20-de mikkang ma·sigipa camera-rang ong·a aro iako salo konta 24-ni nitimna aro maiba a·sel ong·anirangoba ja·mano nipilna gita chipe rakkina man·a.
Ia CCTV camera-rangko chatanichi, ong·gija dakgipa kamrangko champengna, niam retirangko nambate nirokna aro banoba manderangni dakchakanirangko nangan somoirangoba dakchakanirangko on·na man·gnok ine official-rang aganaha.
Shillong songjinmani ramarango niamrangko rakbatatchina aro salo konta 24 nirikkianiko dakna gita Meghalaya sorkari, Shillong Police-na ge·etaniko on·manahachim.
