RESUBELPARA: North Garo Hills a·jani Bajengdoba jolo donggipa Korepara health sub-centre-ni obosta namsrangjaengahani gimin songni manderang, suk ong·gijaniko parakatenba, ia sub-centre-ko ta·raken taripile on·china sorkariko didiataha.
Jolo songdongenggipa manderangni u·iatani gitade, ia Korepara sub-centre-ko bilsi 30-na skangan kuliaha aro ia jolrango komibeoba damsni songni manderang, ia sub-centre-on sanna bananirangko ra·na pangchaktokpaengachim. Indake ong·genchimoba, ia sub-centre-ko taridape on·anirang dongjani a·sel da·o ia sub-centre-o kam ka·enggipa manderang aro sanna bananirangko ra·enggipa manderangba neng·nikanirangko chagrongna nangtokengaha ine songni manderang parakataha.
“Ia sub-centre-oni km 5-mang chel·ao donggipa Samkalakgre songoba damgipin sub-centre donga indiba ia Korepara sub-centre-o komibeoba songni damsnini manderang, sanna bananirangko ra·na pangchaktokpaengachim. Indake ong·genchimoba, ia sub-centre-o bijoliba dongja, chiba dongja aro toilet namaba dongjani a·selan ia centre-o kam ka·enggipa manderang aro sanna bananirangko ra·enggipa manderangba neng·nikanirangko chagrongna nangtokenga,” ine songni manderang parakataha.
Ia sub-centre-o kam ka·enggiparangnaba staff quarter-rangba dongjani a·selan ia centre-o kam ka·enggipa manderang, dingtang biaprangosa dongna nangtokenga ineba songni manderang parakataha.
Koborko on·ani gitade, ia sub-centre-o kuturi ge·gittam ba ge·bri donga aro ia kuturirangoni staff-rangni jakkalgipa kuturimangmangsan asongchaknaba namaia.
Ia sub-centre-ni pakmarang aro nokkingrangba nosto ong·tokaha aro da·o gita wachini somoirangode mikka selpruprue kamrangkoba ka·na man·jaengaha ine kobor on·timgiparang parakataha.
Ia sub-centre-ni nokkingi bolrang chabapilengaha ine janapatskaengon, “Ia sub-centre, je somoioba be·gruani cholrang dongaiaha indide maikai ia sub-centre-o kam ka·enggipa nurse-rangba ia biapo donge kamko ka·na sikgen?” ine songni manderang sing·doataha.
Indake ong·engon, ia apsan biapon labour room-koba rikengahachim indiba ia labour room-ko rikaniba namsrangja ine songni manderang matnangataha.
“Ia labour room-ko rikna bilsi gittamna skangan tangka paisarangko chamatahachim indiba da·alonan kamrangko matchotkujaenga. Ia labour room-ko rikani kamrang namjani a·selan badiaba bakrangode da·on bretanirangko nikna man·engaha,” ine songni manderang parakataha.
