SHILLONG: Raja Raghuvanshi-ko so·otani bidingo police-rang talbate sandirokangkuengon, ‘Sanjay Verma’ ine Sonam-ni phone-o biming dongipa mandeara, uni ‘mikchagipa’ Raj Kushwaha-anchim ine police-rang ma·sina man·aha.
Meghalaya Police-ni u·iatani gitade, sal 39-ni gisepon Sonam-ni phone aro ia nomborni gisepo phone ka·grikani chang 239 gapaha. Sonam-ni phone-o ‘Sanjay Verma’ ine dongipa mandeara, uamangni karkanao accountant-ni kamko ka·enggipa Raj Kushwaha-an ong·achim ineba police-rang ma·sina man·aha.
Da·o Raj Kushwaha-koba police-rang, Raja Raghuvanshi-ko so·otna chanchidilgiparangoni saksa ine chanaha.
Sonam aro Raj-ni mikchagrikaniko darangba chanchichipjana gitasa ua Raj-ni bimingko ‘Sanjay Verma’ ine donahakon ineba police-rang chanchichipenga.
Ia a·selni bidingo police-rang ma·sina a·bachenga intalan Raj Kushwaha-ni mobile phone switch off ong·aiahachim.
Iani bidingo Sonam-ni adagipa Govind-o sing·sandion, “Sanjay Verma minggipa mandeko anga ma·sija indiba uni phone sokbarongakosan angade ma·siaia,” ine aganchakaha.
Uni nokdangde da·o Sonam baksa maming bak dongjaha aro uamangba Raja-ni nokdang baksasa kakket bichalna dabienga ineba Govind aganaha.
Indore songjinmaoni bia ka·daldale re·bagipa Raja Raghuvanshi aro Sonam-ni May 23 tariko gimaangaoni salchetni ja·man, June-ni 2 tariko Raja-ni sogimin manggisiko, Sohra jolo donggipa Wei Sawdong Falls sambaoniko man·ahachim. Raja-ni manggisiko man·ani ja·man Meghalaya Police, SIT-ko songe, ia a·selni bidingo sandirokna a·bachengaha aro ia mandeko so·otanina uni jikgipa Sonam, uni mikchagipa Raj Kushwaha aro uamangni so·otna tik ka·gipa mande sakgittam, chong·motan Vishal Chauhan, Akash Rajput aro Anand Kurmi-koba rim·na man·aha.
