TURA: South Garo Hills a·jani Chokpot jolo donggipa Bandaregre RMSA skulni Science aro Mathematics skigipa, kamtangko name ka·jaenga ine Chokpot jolni dol 7 NGO-rang parakatenba, ia skigipani biapo sakgipinko ra·skachina sorkario dabiangaha.
Chokpot NGO-rangni parakatani gitade, ia skigipani bidingo badi ka·anirangko man·soani ja·man uamang, Bandaregre RMSA skulona re·ange sing·sandianirangko dakon, Hat Singimari-ni Hannan Shek minggipa Science aro Math skigipa, kam ka·chengaonin bilsio salgittamrangsan re·bae skulni chatro chatrirangna skie on·kuenga ine ma·sina man·aha.
“Chingna u·iatani gitade, ia skigipani kamtangko ka·na gisik nangjani giminan 2024 aro 2025 bilsioba Education department, changgnina kingking show cause notice-ko on·pilahachim indiba da·onan ua kamtangko ka·na gisiko nangjaenga. Uni gimin ia skigipako kam ra·galsrange uni biapo sakgipin skigipako ra·skachina chinga South Garo Hills a·jani District School Education Officer (DSEO)-ko didienga,” ine Garo Students Union (GSU) Chokpot regional unit-ni president Jish A Sangma parakataha.
Indake ong·engon, ia skulo da·alona kingkingan Economics skigipaba dongkujaenga ine Chokpot jolni NGO-rang parakatenba, ia skulna ta·raken Economics skigipakoba ra·china sorkariko didiataha.
 |
ReplyForward
|
