TURA: Garo Hills-ni a·arangko nambate nirok simsakna aro nambate see rakkina man·na gita Sukrobar salo, Garo Hills Autonomous District Council (GHADC)-ni Mission Aman A·song program-ko a·dokni Chief Minister Conrad K Sangma-ni jakchi, Tura-ni Dakkopgre-o donggipa SMELC-o a·bachengate on·angaha.
Ia Mission Aman A·song programara, GHADC-ni ning·o donggipa A·kingrangko toe, wa·reng salenba internet-o chipe donna miksongenggipa program ong·a aro ia Mission-ni ning·o GHADC-ni kamrangko altubatatna gita sorkarirangni a·arangkosan ong·aigija manderangni a·arangkoba apsan daken, toani ja·man wa·reng sale internet-o donatna miksongenga.
Ia Mission Aman A·songko a·bachengate on·anganio a·dokni Chief Minister, jinmana aganprakangengon, GHADC-ni ning·o donggipa Garo Hills-ni pilak A·kingrangko nirok simsakanio, ma·sisretani aro neng·nikanirang dongjana gita GHADC-ni Land Record System-ko nambate chalaina Digital India Land Records Modernisation Programme (DILRMP)-ni ning·o a·arangko aro arirangko see rakkina ia program-ko a·bachengataha ine parakataha.
Garo Hills-ni a·kingrangko nambate nirok simsakna aro chel·chakna gita iandakgipa program-rangko ra·gate ka·engani gimin ua dingtangmancha GHADC-koba mittelpilangenba, iandakgipa GHADC-ni kamrango bakrimani aro dakchakanirangko on·china gita Nokma Sanerangko didiangaha.
Ia Mission Aman A·songko a·bachengatanio dongpae bak ra·anggipa gipin manderangara, West Garo Hills a·jani Deputy Commissioner Vibhor Aggarwal, GHADC-ni Chief Executive Membor (CEM) Albinush R Marak, Deputy CEM Nikman Ch Marak, MDC-rang aro gipinrang ong·a.
