Damas-o District Nutrition Leadership Programme-ni bak ong·e Red Food Day-ko mania

Damas: Jatni dakbewalo cha·a ring·anina simsakani bidingo mejal Damas-o 2025 June 12 tariko District Nutrition Leadership Programme (DNLP)-ko a·bachengatan baksa  manderangni an·seng-baljokanina community-ni gita ong·atanio dal·begipa chu·sokaniko North Garo Hills-ni manderang man·ani chin gita ong·enga aro Red Food Day-ko maniaha.
Damas North Garo Hills Community Hall-o Red Food Day-ko maniaha ian 2025 bilsini July 10 tariko Shillong-o District Nutrition Leadership Programme (DNLP) workshop ong·ani somoio mongsonggipa dakna nanggiparangoni mingsa ja·ku de·ani point-rangna nipiltaianggipa ong·a.
Manianio dam 18 Village Organistion (VO-rang)-ko apsan rimbachimongaha, Catholic Health Association of India (CHAI), aro Health, ICDS, MSRLS, Horticulture, Food Safety, aro District Administration-ko man·chape dingtang dingtang department-rang tom·anio apsan bakko ra·angaha. Ian gitalgipa chapter-ni signal-rang ong·enga jeon community-rang songni gadango nutrition champion-rang ong·e ja·ku de·na ma·giparangchi dila.
Disstrict Mission Manager, MSRLS Printush M Sangma-chi rimchoksoani kattarangko aganangaha aro Red Food Day ian symbolic-na bata, VO-rangni aro community-ni dilgiparangchi iron deficiency, nutrition chu·onggijana aro maternal anemia-ko ja·dil ja·pangoni aganangaha.
Salantio dakna nanggiparang jekai chi rite ringna ba iron donggipa cha·ani baksa Vitamin C-ko jakkalna ge·etanio noktangoni namatani cholrangko tang·dodapatna Damas Cluster Level Federation (CLF)-ko Block Development Officer, Resubelpara, Shri Liam Tesat G Momin, MCS, didiangaha.
Eat Right India campaign-oni mongsonggipa kattarangko District Food Safety Officer, T.T Sangma-chi dakmesoke agan-talataha. Chini, kari aro mitdim-ko ra·anio MSG-ko komiatchina aro joltangni tarigipa jekai karatchi cha·anio naljokbatgipa ong·a ine ua indakgiparangko jakkalchina mol·molangaha.
WIFS (Weekly Iron aro Folic Acid Supplementation)-ni gita Iron-Folic Acid (IFA)-ko pangnan ra·china didiangaha, dal·drobaenggiparangni cha·ani aro academic-o cha·ani gisepgriko simsakani gimin Dr. (Mrs.) Priya Sengse R. Sangma, District Medical & Health Officer (DM&HO) aganaha. Iarangna gisiko dakchakani on·a teacher-rang aro songni nokmarangko ua okamaha aro symbolic IFA-ko bi·sarangni Anganwadi-na sualangaha.
Damas PHC-oni ANM-rangko man·chape medical-ni manderang WASH (Water, Sanitation aro Hygiene)-ko dake mesokangaha, jean diaarhea ong·aoniko champenga aro jakko rongtalantale rakkianiko skidilangaha. Anganwadi centre-rangoni bi·sarang community-ni mi ong·ako cha·na skang jaksuako kusi ong·e dakangaha.
Chakchik A’gitok Sangma, Horticulture Development Officer, Nutri-Garden-ni miksonganiko talataha, noktangtango vitamin aro iron bang·gipa mesu samjakrangko ge·china nokdangrangko didiangaha.
Early Childhood Development (DPM-ECD)-ni District Programme Manager Mellora Marak-ba dongpae ku·pattianirangko on·angaha.
Anganwadi Centre-rangko giproroatanio mongsonggipa dakna nanggniko programme-o Shri Achilles Tangrik D Shira, CDPO, talataha.
Maniani matchotao songni manderangni gita ka·sae on·gilgipa iron gnanggipa mesu samjakrangko VO membor-rangni gita songe rite on·anichi community mi cha·sik ringsikanirangko tariangaha.