SHILLONG: Gipin biaprangoniko Meghalaya a·dokona ra·baenggipa matchu matterangko be·enni gita porikka ra·e nisona health check gate-ko rikengaha aro ia check gate-ko bakan matchotgnok ine a·dokni Animal Husbandry & Veterinary (AH&V) Minister AL Hek parakataha.
Hek-ni parakatani gitade, a·dokona ra·baenggipa matchu matterangko porikka ra·e nina gita a·dokni biap damgnio health check gate-ko rikenga aro ian damsade Ri Bhoi a·jao aro damgipinde Garo Hills-o ong·enga.
Ri Bhoi a·jao rikenggipa health check gate-de da·o matchotangengaha indiba Garo Hills-o rikenggipa check gate-nasa adita somoirangko nangkugen ineba Minister parakataha.
Meghalaya a·dokni simarango matchu badingsrukanirangko champenganio chu·sokgipa ong·engani gimin Border Security Force (BSF)-ko mittelpilangengon, je matchurangkon rim·e BSF-ni camp-rango donengachim, ia matchurangko a·jatangtangni deputy commissioner (DC)-rang, a·dok sorkarina pakwate on·anggen ine Hek aganaha.
Indake ong·engon, Meghalaya a·doko Bharatiya Janata Party (BJP) bilakbapiltaigen ineba BJP-ni MLA AL Hek, an·tangni ka·dongchakenganiko parakataha.
Meghalaya a·doko MLA sakgnina agrede BJP chedapna man·kujaenga ine gisik ra·atpilaniko on·angengon, dilgipako seokanide manderangni skani aro bilan ong·a ine Hek aganaha.
“Manderang, BJP-ko seokna nangnikjaenga ong·ode chinga mamingkoba dakna man·jawa,” ine ua aganaha.
Swami Vivekananda-ni bebera·ani gitan ua an·tangba, “Chakatbo, mikrakbo aro an·tangni miksongako chu·sokatkujaskal dongtongnabe” ia kattarango bebera·a ineba BJP MLA parakataha.