SHILLONG: Sorkarini dingtang dingtang scheme-rangko ra·na gita sorkari, Aadhar-ko nangchongmotgipa ong·atengon, Aadhar-na agreba manderangni dingtang dingtang identity (ID) card-rangko ra·chakchina gita Sombar salo, Meghalaya High Court, a·dok sorkarina ge·etaniko on·angaha.
Iani bidingo raiko on·atengon, sorkarini on·enggipa namgnirangko ra·na gita manderangoni saoba Aadhar nombor ba card-ko on·na man·jagenchimode ba Aadhar-na biming segatna nangnikjaenga ong·ode, PAN card, voter card, passport ba uandakgipa ID card-rangko mesoke, an·tangni a·songo songdongkamgipa ong·aniko mesokna man·skana nanggen ine Meghalaya High Court-ni Chief Justice Prasanna Mukerji aro Justice Wanlura Diengdoh-ni division bench parakataha.
Sorkarini on·enggipa namgnirangko ra·na gita Aadhar nombor ba card-ko on·na man·jagenchimoba, ua mandeo nanga gita sakkirangko mesokna man·genchimode, una sorkarini on·enggipa namgnirangko jechakna man·jawa ineba kachari parakataha.
Aadhar (Targeted Delivery of Financial and other Subsidies, Benefits and Services) Act, 2016-ni Section 7-ni ning·o Supreme Court-ni changgnina rai on·gipao pangchake South Garo Hills a·jani social activist Greneth M Sangma-ni public interest litigation (PIL) ka·aniko knatimani ja·man Meghalaya High Court, ia raiko on·ataha.
SC/ST chatro chatrirangna on·enggipa post matric scholarship-ko man·na gita chatro chatrirang, Aadhar nombor ba card dongna nangtelgen ine 2023 bilsini October 31 tariko a·dok sorkarini u·iataniko on·angani ja·man Greneth M Sangma, sorkarini kosako ra·bie, High Court-o PIL-ko ka·aha aro uandaken ia jera ra·anio chegipa ong·na man·aha.
Ia PIL-ni bidingo Meghalaya High Court, re·baenggipa August 12 tariko hearing-ko daktaina tik ka·e donangaha.