SHILLONG: Meghalaya High Court-ni on·gimin ge·etanio pangchake Mongolbar salo, Shillong Municipal Board (SMB)-ni official-rang, Shillong songjinmani Khyndailad-o ma·manti bosturangko palbadinge cha·enggipa manderangko a·rikgalaha.
Ia a·rikgalaniko dakanio SMB-ni official-rang, Certificate of Vending (CoV) gri Khyndailad ramao palbadinge cha·enggipa manderangni dokkanrangko pe·e galaha aro ma·manti bosturangkoba rim·aha.
Niam gri bostu palbadinge cha·enggipa manderangko July 22 tarikni gisepon, ia biapko watchina gita a·dok sorkari ge·etaniko on·ahachim aro batanggimin salrango SMB-ni official-rang, palbadinge cha·na permit donggipa aro donggijagiparangko am·sandina a·bachengahachim.
“Je manderangan COV-rang donge, ia biapo bosturangko pale cha·enga, uandakgipa manderangkosan ia biapo pale cha·na on·engkua indiba gipinrangkode ia biaponiko a·rikgalenba, uamangni bosturangkoba rim·na nangao ga·akaha,” ine SMB-ni official saksa, kobor ra·timgiparangna aganaha.
Shillong songjinmao, mongsongbate Khyndailad gita apchangket ong·gipa biaprango skatang bostu palgiparangko champengna man·jaengani gimin Meghalaya High Court, a·dok sorkari aro municipality official-rangna ge·etaniko on·ani ja·man Khyndailad-o permit gri bostu pale cha·enggiparangko SMB official-rang, a·rikgalna a·bachengataha.
Ia biaprango niamrangko rakkina aro niamrangko nirokna gita High Court, dingtangmancha special officer-koba songe on·ahachim.
High Court-ni ge·etani aro Street Vendors (Protection of Livelihood and Regulation of Street Vending) Act, 2014-ni niamrango pangchake a·dok sorkari, bostu palbadinge cha·enggiparangna biap damgittamko tik ka·manaha aro ia biaprangara, MUDA Complex, Khyndailad-o donggipa SBI Main Branch sambani parking lot aro Meghalaya Transport Corporation (MTC)-ni gitcham building-o ong·a.