TURA: Paromgre songoniko koela bikotna gita Georgeman S Marak minggipa mandena Nokmani a·a palaniko songni manderang raken jegalatenba, a·a palaniko ra·pilchina dabiangaha.
Koborko on·ani gitade, ia songara, Nokrek Biosphere-oni adita metre-rangsan chel·grikaiachim aro ian manderangni rona namnikgipa Wari Chora songni bisikan ong·achim.
Paromgre songara, South Garo Hills a·jani Chokpot C&RD Block ning·o ga·akgipa song ong·a.
Ia songara, South Garo Hills a·ja gita jokangenggipa mongsonggipa chiringrang, jekai Rongdik, Rompa, Kakija, Rekman aro Kantasi chiringrangni bisikba ong·a aro ia songo koela bikotgenchimode mikkangchi, ia chiringrang pilakan tipani cholrang donga ine songni manderang parakataha.
Jolo songdongenggipa manderangni parakatani gitade, ia songni hectare 150 ong·gipa a·arangko songni Nokma, Garo Hills-o koela badinggipa Georgeman Marak-na palaha aro ua ia biaponiko koela bikotna a·bachengengaha.
Indake ong·engon, ia songo koela bikotna gita a·a palani gimin Paromgre A·kingni Chrarang aro Maharini membor-rang, Nokmani kosako raken jegalaniko parakattokaha aro ia a·arangko ta·raken ra·pilchina dabiangtokaha.
Ia biaprangko songni Nokma, Paromgre A·kingni Chrarangna aro Maharina u·iatchenggijasa, gong lak 50-na palaha ineba uamang matnangataha.
“Chinga Paromgre A·kingni Chrarang aro Maharini membor-rang, koela bikotna gita a·a palani gimin Nokmani kamko raken jegalenga. Ia songo drae koela bikotna jotton ka·genchimode chinga rakgipa ja·kurangko de·angskagen. Nokma, a·ani tangkarangko Georgeman Marak-na on·pilna nanga aro ia songgigrikaniko den·galpilna nanga,” ine Paromgre A·kingni Chrarang aro Maharini membor-rang parakataha.