SHILLONG: Meghalaya a·doko nosto ong·e dongenggipa skul nokrangko seoka man·gipa MLA-rang pilakan an·tangtangni tangka paisarangchi rikpilna nanga ine a·dokni Education Minister Rakkam A Sangma-ni ku·monganiko on·angani ja·man, uni agangipa kattarangko a·dokni Trinamool Congress (TMC) jegalatenba, ‘skul nokrangko rikanio chatro chatrirang an·tangtangan itarangko ra·bachina aro skigiparang cement-ko ra·baskachina’ ine matnangataha.
Education Minister-ni agangipa kattarangko jegalatengon, sorkari an·tangari ia kamrangko ka·na man·jaengani giminsa seoka man·gipa MLA-rangko, nokgipa rikgipa ‘mistri’ aro contractor dake ong·atna miksongenga ine TMC-ni dilgipa Richard Mrong Marak matnangataha.
“MLA-rang an·tangtangni tangka paisarangchi skul nokrangko rikpiltaina nanga ine Education Minister Rakkam aganenga. Maina MLA-rangsan kamko ka·aigen? Chatro chatrirang itarangko ra·bachina aro skigiparangba cement-rangko ra·baskachina. Education Minister an·tangan contractor dakesa mesokenga ong·ode a·dokni sorkaride bon·aiaha,” ine Marak aganaha.
Meghalaya a·doko, mongsongbate Garo Hills-o bang·a skulrangan sorkarini nirok sandianirang dongjani a·sel obosta namjabatroroengaha ine adita salrangna skang, Opposition dolko dilenggipa Mukul Sangma, a·dok sorkariko matnangatani ja·man, skulrangko namdapatanio seoka man·gipa pilak dilgiparangkon ku·cholsan bakrimchina gita a·dokni Education Minister Rakkam A Sangma didiatahachim.
An·tangni Rongara-Siju constituency-ni gimin janapatengon, ua MLA scheme-ni tangkarangoniko skul damprakna gong lak 2 ka·e koros ka·enba, dam 45 Adhoc aro SSA skulrangko taridape on·na man·aha ine Rakkam a·kangatahachim.
MLA sakprak bilsio dam 50 skulrangko jako ra·e taridapgenchimode, a·dokni lekka porani gadangko namen dingtangatna man·gen ineba Education Minister, pilak MLA-rangkon bakrimchina didiatahachim.
Uni iandakgipa kattarangna mittelpilaniko man·ani pal a·dokni Education Minister, TMC-ni matnanganikosa man·skaaha.