TURA: West Garo Hills a·jani Chibinang Bazar-o songdongenggipa manderang bijoliko name man·jaenga ine Phulbari Sub-Division-ni ning·o donggipa FEDCO-ni SDM-na badi ka·doatenba, ia jolrango bijoliko nambate on·china didiataha.
Chibinang Bazar jolrango songdongenggipa manderangni parakatani gitade, Chibinang-ni gitcham SBI-o donggipa transformer nosto ong·ahani a·selsa ia jolrango bijoliko name man·jaenga aro ia line-ko da·onan te·srekujaenga.
Antisa batpile bijoli dongjaengani a·sel neng·nikanirangko chagrongna nangtokengaha ine janapatengon, sagipa ding·giparang, poraienggipa chatro chatrirang, butchuma budeparang aro bading chiwale cha·giparangba bijoli dongjani a·selan neng·nikanirangko chagrongna nangtokenga ine Chibinang Bazar jolo songdongenggipa manderang parakataha.
Bijolini kajinarangkode official-rang somoi gita ra·rongenga ine janapatskaengon, SBI sambao donggipa 25 KV transformer-ni biapo 250 KV gital transformer-ko te·srechina aro somoi gita nirokjringchina Chibinang Bazar-o songdongenggipa manderang, FEDCO-ni SDM-ko didiataha.