TURA: Assam a·dokni dingtang dingtang biaprango niam gri songdongenggipa manderangko Assam sorkari a·rikgalna a·bachengahani gimin ia manderang, Garo Hills-o katnape songdongskaani cholrang dongenga ine A·chik Dedicated Integrity Leaders (ADIL) Western Zone parakatenba, iandake Assam-oni niam gri napsrukaniko champengna gita Dadenggre Civil Sub-Division-ni ning·o donggipa dingtang dingtang biaprango Infiltration check point-rangko songchina didiataha.
Iani bidingo Dadenggre-ni Sub-Divisional Officer (Civil)-na seachi u·iatengon, Assam a·doko niam gri songdongenggipa manderangko Assam sorkari a·rikgalengahani gimin ia manderang, Garo Hills-ona napsrukbae songdongskaani cholrang donga ine ADIL Western Zone Phulbari-ni dilgiparang parakatenba, Dadenggre sub-division-ni ning·o donggipa Tikrikilla, Nidanpur, Chibinang, Bhaitbari aro Phulbari-o Infiltration check point-rangko songchina didiataha.
“Ia biaprangara, Assam-ni simao ong·ani gimin ia biaprang gita Garo Hills-ona napsrukbaani cholrang dongenga. Uni gimin Garo Hills-o songdongenggipa Tribal-rangko chel·chakna aro niam gri napsrukanirangko champengsona gita kosako janapgimin biaprango Infiltration check point-rangko kulichina chinga didienga,” ine ADIL Western Zone-ni president Jack Sangma parakataha.