Gital Assembly-ni bario bolrangko ge·a
SHILLONG: Budbar salo, a·dokni Forest department, Meghalaya Legislative Assembly baksa nangrime, Shillong songjinmani Mawdiangdiang-o gital rikenggipa Assembly-ni bario bol ge·ani program-ko ong·atangaha aro ia program-ko ong·atanio, a·dokni Governor CH Vijayashankhar, a·dokni Chief Minister Conrad K Sangma, Assembly-ni Speaker Thomas A Sangma, Deputy Chief Minister Prestone Tynsong, Deputy Speaker TD Shira, gipin Cabinet minister-rang aro dingtang dingtang party-ni MLA-rangba bak ra·e bolrangko ge·angaha.
Ia program-ko ong·atanio a·dokni Governor, jinmana aganprakengon, gital rikenggipa Assembly-ko nitobeaha ine mittelangenba, Meghalaya a·dokni nitobegipa biaprangko ripinge rakkina nangengani gimin aganangaha.
Meghalaya a·doko man·gipa ma·manti sam-bolrangni gimin janapangengon, gama ge·anirango mingsankosan ge·aigija samtangtangni namgnina dingtang dingtang bolrangkoba ge·china Governor didiangaha.
Meghalaya a·dokko ‘salgi’ gita toe aganangenba, mikkang chasongrangonan name rakkiangkuchina ku·pattianiko on·angengon, “Meghalaya a·doko atchigiparang pilakan rasong gnangbegiparang ong·a,” ine Vijayashankhar aganaha.
Ia program-ko ong·atanio, Meghalaya Assembly-ni Speaker Thomas A Sangma-ba jinmana aganprakengon, ia program-ko ong·ataniara, samtangtangko chel·chakanio ku·cholsan kamko ka·na ku·rachakani gita ong·enga ine parakataha.
Ia tom·anio a·dokni Chief Minister Conrad K Sangma-ba aganprakengon, bolrangko ge·mangmangaigija, uarangko name dal·atna gita simsak nirokaniko on·china a·dokni MLA-rangko didiangaha.
‘One Citizen, One Tree’ campaign-ko chu·sokgipa ong·aha ine janapatengon, ia campaign-ni ning·o, a·dokni dingtang dingtang biaprango pang krorgnimangni gita bolrangko ge·aha ine Chief Minister parakataha.