SHILLONG: Assam a·dokni dingtang dingtang biaprango niam gri songdongenggipa manderangko Assam sorkari a·rikgalengani a·sel Meghalaya a·dokona, mongsongbate Assam baksa nangchapgipa biaprangona napsrukani cholrang donga ine niksamsona man·engani gimin niam gri napsrukanirangko nambate nirokna gita Bristibar salo, a·dokni Chief Minister Conrad K Sangma, dingtang dingtang deputy commissioner-rang, sorkari officer-rang aro police official-rang baksa tom·e chanchirimangaha.
Ia tom·anio, a·dokni Chief Secretary DP Wahlang, Director General of Police (DGP) Idashisha Nongrang, Home department-ni Additional Chief Secretary aro Political department-ni officer-rangba bak ra·angaha aro ia tom·anio a·dok gimikni deputy commissioner-rangba video conference gita bak ra·angtokaha.
Tom·a matchotani ja·man kobor ra·timgipa manderangna talataniko on·angengon, Assam a·doko niam gri songdongenggipa manderangko a·rikgalengani gimin Assam a·dok baksa nangchapgipa Meghalaya a·dokni simarango nirokanirangko bilakdapatna gita pilak deputy commissioner-rang baksa tom·e chanchirimaha ine Chief Minister parakataha.
“Assam-o niam gri songdongenggipa manderangko a·rikgalengani gimin a·doko, mongsongbate Assam baksa nangchapgipa sima jolrango napsrukna jotton ka·ani cholrang dongani gimin niam gri napsrukanirangko mikrakbate nirokchina ge·etaniko on·aha,” ine Sangma aganaha.
Sima jolrango, mongsongbate Assam a·dok baksa nangchapgipa biaprango, niam gri napsrukanirangko mikrakbate nirokchina, deputy commissioner-rangna ge·etaniko on·aha ineba Chief Minister parakataha.
Niam gri napsrukbaenggipa manderangni kosako rakgipa ja·kurangko de·na aro u·iatanirangko dakna gita district administration-rang, Village Defence Party (VDP)-rang aro songko nokko dilenggipa manderangko ku·cholsan ong·e kam ka·china u·iataha ineba Sangma parakataha.
“Assam-o niam gri songdong a·chaenggipa manderangko a·rikgalanichi Meghalaya a·dokona katnapskana chol ra·aniko champengna gita deputy commissioner-rangko block level-o, BDO-rang baksa, thanarang baksa, police-rang baksa, dingtang dingtang songni VDP-rang, NGO-rang aro songko nokko dilenggipa manderang baksa agangrikjringe kamko ka·china u·iataha,” ine ua aganaha.
