SHILLONG: Shillong songjinmani Mawdiangdiang-o gital Meghalaya Legislative Assembly-ko rikanio adita neng·nikanirangko man·e ja·manchakna nangengani gimin ia gital Assembly nokko, re·baenggipa 2026 bilsini Budget Session-ko ong·atani somoio nokdonggana a·dok sorkari tik ka·angaha.
Ia gital Assembly nokko, ia bilsini Autumn Session-ko ong·atani somoion nokdonggana a·dok sorkari tik ka·ahachim indiba kamrangko ka·anio adita neng·nikanirangko man·e, ja·manchakna nangengahani gimin re·baenggipa bilsio nokdonggaskana tik ka·angaha.
Official-rangni u·iatani gitade, ia gital Assembly nokko rikani da·o bon·kamgipa bako ong·engaha aro kamrang 95 percent-ni gitade matchotmanaha.
Ia gital Assembly-ko rikanio ka·dongsoana bate dingtang dingtang ra·bianirangko chagrongna nangaha ine janapatengon, “Gital Assembly nokko rikanio adita neng·nikanirangko chagrongna nangengani a·sel ja·manchakatako man·aha. Ia Assembly-ni hall-ko tarianio kamrang bang·bate nakatenga maina chinga naljokaniko on·na aro gam·anirangkoba nambatatna nangnikenga,” ine a·dokni Chief Minister Conrad K Sangma, kobor ra·timgiparangna parakataha.
Ia gital Assembly nokko rikanio, rong·kuchakani aro gam·pilanirangko tarina nange kamrang ong·katdapenga ineba Chief Minister talataniko on·angaha.
“Ian hall namen dal·ani gimin rong·kuchakanirangko knana man·enga. Anga chu·gimikkode talatna nangnikjaenga indiba ia Assembly-o chinga bakan napna man·gnok ine anga ka·dongenga. Uni gimin ia nokko matchotnasa chinga senge dongtokenga,” ine Sangma aganaha.
Assembly-ko rikanio kamrangko name nirokenga ine ua Assembly-ni Speaker Thomas A Sangma-ko mittelpilangaha aro MLA-rang baksana gipin dilgiparangkoba ua mittelpilangaha.
Ja·mano ua Assembly-ni kamrangkoba niangaha.