TURA: Sorkarini on·enggipa dingtang dingtang scheme-rang, mongsongbate chatro chatrirangni scholarship-rangna Aadhar-na agre gipin Identity (ID) card-rangkoba ra·chakna nangaigen ine adita salrangna skang Meghalaya High Court-ni raiko on·atani ja·man, sorkarini scheme-rangko ra·nade Aadhar-ko nangtelaigen ine a·dokni C&RD Minister AT Mondal aganskaahani gimin, uni agangipa kattarangko South Garo Hills a·jani social activist Greneth M Sangma jegalataha.
Sorkarini on·enggipa namgnirangko ra·na gita Aadhar nombor ba card-na agreba manderangni gipin ID card-rang, jekai PAN card, Voter ID card, passport ba uandakgipa ID-rangko sorkari ra·chakna nanga ine adita salrangna skangsan Meghalaya High Court raiko on·angahachim ine nikna man·a.
Aadhar (Targeted Delivery of Financial and other Subsidies, Benefits and Services) Act, 2016-ni Section 7-ni ning·o Supreme Court-ni changgnina rai on·gipao pangchake South Garo Hills a·jani social activist Greneth M Sangma-ni public interest litigation (PIL) ka·aniko knatimani ja·man Meghalaya High Court, ia raiko on·atahachim.
Indake ong·engon, ma·mong sorkarionin dingtang dingtang central scheme-rangko ra·na gita Aadhar-ko nangtelgipa ong·atahani gimin Meghalaya a·dokoba ia apsan niamkon ja·rikna nangaigen ine a·dokni C&RD Minister, sorkarini on·enggipa namgnirangko ra·na nangnikgenchimode Aadhar-na biming segattelna nanggen ine aganskaaha.
MGNREGA-na Aadhar-ko nangengani gimin janapatengon, “Badiaba songo mande saksani Aadhar-koba sak 100 job card holder-rang baksa link ka·jagenchimode songgimikan MGNREGA-ni namgnirangko man·jawa ine Rural Development Ministry-onin chingna ge·etaniko on·manaha,” ine Mondal parakataha.
Uni iandakgipa kattarangko jegalatskaengon, Supreme Court-ni on·gimin rai aro 2016 bilsini Aadhar Act-o janapani gitade, sorkarini on·enggipa namgnirangko ra·na Aadhar-ko nangtelgipa ong·atna man·jawa maina ia Act-ni Section 7-on, Aadhar donggijagipa mandena sorkarini dingtang dingtang kamrang, jekai pension, ration ba uandakgipa jechakna man·jawa ine talen janapaha ine Sangma parakatskaaha.
“Meghalaya a·dokko man·chape pilak Tribal area-rangnan Constitution-ni Sixth Schedule-oba jakgitelaniko on·manaha. Uni gimin ia bilo pangchake manderang an·tangtangni skani aro bil gita janggi tangna man·a,” ine Greneth Sangma parakataha.
Manderangna iandakgipa kattarangko parakatna skang ua Aadhar Act 2016-ni ning·o on·gimin niamrangko name poraichengna nanga ineba Sangma parakataha.