TURA: West Garo Hills a·jani Pedaldoba Chiram-oniko niam gri an·cheng bikotenga ine A·chik Dedicated Integrity Leaders (ADIL) Raksamgre Unit, Pedaldoba unit aro Phulbari western zone, Holaidanga-ni Range Forest Officer-na badi ka·doangaha.
Forest Officer-na ADIL-ni badi ka·doangani gitade, Pedaldoba Chiram-oniko maming permission ra·chenggija aro nangchongmotgipa lekkarang grisa dingtang dingtang kolrangko jakkale, bilsisa batpile an·chengrangko bikotenga aro ian a·dokni niamrangko pe·ani gita ong·enga.
Ia biaponiko niam gri an·cheng bikotanichi, chiring chibisikrangna aro samtangtango ong·telaigiparangna nangchakeaniko ra·baenga ine matnangatengon, ia biapo niam gri an·cheng bikotaniko ta·raken champengatchina ADIL dol, Holaidanga-ni Range Forest Officer-ko didiataha.
