TURA: Garo Hills Autonomous District Council (GHADC)-o kam ka·enggiparang ja 43 batpile, an·tangtangni dormaharangko man·tokkujaengani gimin aro Executive Committee (EC)-ko chalaienggipa MDC-rangoniba uamangni dormaharangko on·ani bidingo maming ku·rachakanirangko on·anirang dongkujaengani gimin re·baenggipa July-ni 28 tarik Sombar salo, Non Gazetted Employees Association (NGEA)-ni gita jinma re·jomaniko ong·atna tik ka·angaha.
Jinma re·jomaniko, GHADC office-onin a·bachengate, Tura DC Park, DC office, Tura Bazar aro Hawakhana gita wenbae GHADC office-o matchotatgen ine NGEA-ni president Brithen Sangma parakataha.
GHADC-o kam ka·enggiparangna ja 43 batpile dormaharangko on·kujaengani gimin re·anggipa July 7 tarikonin NGEA-ni membor-rang, kamrangko ka·gija jingjengatanirangko dakengachim ine nikna man·a. GHADC-o kam ka·giparangna komibeoba bilsisani dormaharangko on·na ku·rachakaniko on·genchimosa jingjengataniko dontonggen ineba NGEA parakataha.
Indake ong·engon, GHADC-o kam ka·giparangna dormaharangko on·ani bidingo maming ku·rachakanirangko on·na dongkujaengani gimin re·baenggipa Sombar salo, jinma tom·tome re·jomaniko ong·atna tik ka·aha aro ia re·jomaniko ong·atani gisepon GHADC-ni Executive Committee, uamangna maming ku·rachakanirangko on·na man·jagenchimode Sombar salo tom·e chanchirimtaienba, rakbate jingjengatna tik ka·anggen ine NGEA-ni president parakataha.
“Chingni agangimin gita chingna bilsisani dormahako on·na ku·rachakgenchimoba chinga ia jingjengataniko dontongna kusi ong·aigenchim, indiba da·alona kingkingan Executive Council-ko chalaienggipa MDC-rang, chingna maming ku·rachakaniko on·na dongkujaengani gimin chinga Sombar salo jinma tom·tome re·jomaniko ong·atna tik ka·aha. Uni ja·manba chingna maming ku·rachakanirangko on·na man·jagenchimode chinga rakbata ja·kurangko de·e jingjengatangskagen,” ine Sangma parakataha.