Tura: Tura songjinmani Chitoktak biaponi Deran Gittim-o donggipa bilsi 17 ong·gipa me·a bi·sa adatangko so·otaha, a·sel ong·ako parakatani gitade, salantian adatang chu ringe re·bae nokdango golmal ka·simachimna apsan dake ua attamoba chu ringe re·bae kagija golmal ong·a aro adasa dakgrikaona sokaha.
Adatang dal·gipa chu ringe re·bae ma·gipa aro gipinrang baksa jegrikna a·bachengaha aro ja·mano adasa dakgrike jonggipa adatangko ruachi den·aha, den·a man·gipa adatangko Jekil M Sangma mingachim, ine koborna parakataha.
Den·a man·gipa mandeko ta·rake Tura Civil Hospital-ona ra·angahachim jeon uko ra·bamitingo siaha ine parakataha.
Bilsi 17 ong·gipa jonggipa July 25-o ua apsan walo a·sel ong·gipa biaponi kataha indiba ja·mano July 26 pringo Chandmary Beat House-o nokdangni manderangni gita rim·bae on·aha.
