SHILLONG: Re·baenggipa 2026 bilsio Assam Assembly election-ko ong·atna gita Assam sorkari kamrang jakchakkujaengani gimin a·dok damgnini simarango ong·enggipa golmalrangko namatani bidingo gnigipa agangrikaniko matchotatna man·kujaenga ine Meghalaya a·dokni Deputy Chief Minister Prestone Tynsong parakataha.
Tynsong-ni aganani gitade, a·dok damgnini gisepo gnigipa agangrikanio a·bachengpiltaina gita Meghalaya sorkari, tarikrangko tik ka·china Assam sorkarina seachi u·iatmanahachim indiba Assam-o election-ko ong·atna gita Assam sorkari kamrang jakchakkujae aganchakaniko on·na man·kujaenga.
“Uamang tarikrangko tik ka·na man·kujawa an·ching senge nikuna,” ine Tynsong, kobor ra·timgiparangna aganaha.
Indake ong·engon, Assam aro Meghalaya a·dokni simarango ru·uta bilsirangna ong·enggipa golmalrangko namatna a·dok damgnini gisepo agangrikaniko ta·raken matchotatchina Hill State People’s Democratic Party (HSPDP)-ni president aro West Khasi Hills regional committee-ni membor KP Pangniang didiatskaaha.
Batanggimin somoirango a·dok damgnini gisepo skanggipa agangrikanio ku·rachakanirangko janapatengon, adita salrangna skang Langpih-o tom·aniko ong·atanichi, ia jolrango ong·enggipa golmalrangko namatna gita kamrangko ta·rakatchina Meghalaya sorkarina didianiko on·angaha ine Pangniang aganaha.
Assam sorkari da·o re·baenggipa 2026 bilsini election-na kamrangko ka·na nangengahani gimin ian, Assam election matchotani ja·mansa a·dok damgnini gisepo agangrikaniko a·bachengpiltaina man·aignok ine mesokani ong·enga ineba HSPDP-ni president parakataha.
Assam aro Meghalaya a·dok damgnini simarango ru·utbea bilsirangonin dam 12 biaprango meligrikgijanirangko nikna man·engachim indiba ia dam 12 biaprangoni damdok biaprangkode a·dok damgnini gisepo songgigrike, biaprangko sualgrikahachim. Da·o bangki dongkuenggipa damdok biaprangoba a·dok damgnini gisepo meligrikaniko ra·bana gita a·dok damgnini sorkarirang agangrikaniko a·bachengatahachim indiba ia agangrikanirang da·onan matchotchipskakujaengachim.
Ia a·dok damgnini simarango meligrikna man·jaenggipa biaprangko namatna ja·ku de·enggipa gnigipa bako man·chapenggipa biaprangara Langpih baksana Ri Bhoi a·jani Borduar, Nongwah-Mawtamur, Deshdoomreah, Block-II aro West Jaintia Hills-ni Block- I, Psiar – Khanduli jolrang ong·engachim.
A·dok damgnini gisepo meligrikna man·jaenggipa dam 12 biaprangoni skanggipa bako namatna soi ka·grikgipa biap damdokara, Gizang, Tarabari, Boklapara, Khanapara-Pilingkata, Ratacherra, aro Hahim ong·skaachim.
Ia meligrikna man·jaenggipa damdok biaprangoni sq km 18.51-ko Assam aro sq km 36.79-ko Meghalaya ra·na gita songgigrikahachim.
 |
ReplyForward
|