TURA: Central Reserve Police Force (CRPF)-ni chang 87-gipa Raising Day-ko Robibar salo, Tura-o donako man·enggipa 120 Battalion CRPF dolni gita maniangaha.
Ia salko dingtangmancha jinma bol ge·anichi manina a·bachengataha aro bol ge·aniko, 120 Bn CRPF-ni Commandant Rajeev Lochan an·tangan dilangaha.
Bolrangko ge·ani ja·man jinma rongtal an·talatanikoba dakangaha aro jinma rongtalatanio, 120 Bn CRPF-ni official-rang aro sipairang pilakan bak ra·angtokaha.
CRPF-ni chang 87-gipa Raising Day-ko maniani bak gita dingtangmancha 120 Bn CRPF-ni sipairang, cycle rally-koba Mendipathar-o ong·atangaha.
Una agreba, ia salko maniani bak gita, sianggimin sipairangna mande ra·pilskaani, kal·susaani, cultural program aro jinma apsan cha·rim ringrimanikoba ong·atangaha.
Sainik Sammelan-ko ong·atanio 120 Bn CRPF-ni Commandant Rajeev Lochan, sipairangna aganprakengon, CRPF-ko 1939 bilsini July 27 tariko songchengaha ine talatangenba, mikkim rasong baksa a·songna aro a·songni manderangna dangdike on·angkuchina CRPF sipairangko didiangaha.
