Mongolbar saloni GHADC-o kam ka·giparang darangba kam ka·jawa: NGEA
TURA: Garo Hills Autonomous District Council (GHADC)-o kam ka·enggiparang ja 43 batpile, an·tangtangni dormaharangko man·tokkujaengani gimin aro Executive Committee (EC)-ko chalaienggipa MDC-rangoniba uamangni dormaharangko on·ani bidingo maming ku·rachakanirangko on·anirang dongkujaengani gimin Sombar salo, an·tangtangni suk ong·gijaniko mesokna aro Executive Committee-ni kosako jegale jinma re·jomaniko ong·atangaha.
Jinma re·jomaniko, GHADC office-oni a·bachengate, Tura DC Park, DC office, Tura Bazar aro Hawakhana gita wenbae GHADC office-on matchotataha aro re·jomaniko ong·atanio GHADC-o kam ka·enggipa sak 1000-na batpile manderang bak ra·angtokaha.
Ia re·jomaniko ong·atani bidingo Salantini Janera-na u·iatengon, Mongolbar salonide uamangni jingjengataniko bilakbatatgnok ine Non-Gazetted Employees Association (NGEA)-ni president Brithen Sangma parakataha.
Sangma-ni u·iatani gitade, NGEA-ni jingjengataniko bilakbatatengon, GHADC-ni pilak office-rangkon kulinade on·aigen indiba kam ka·giparangoni darangba office-o asongna aro kamtangtangko ka·na man·jawa.
“Chinga MDC-rangni office-o asonganikode champengjawa indiba MDC-rangna dangdike on·enggipa staff-rang, darangba office-o napna ba kamrangko ka·e on·na man·jawa ine tik ka·aha. GHADC-o judiciary department-ba dongani gimin public-rangoni kam nanggipa manderangde re·bae kamtangtangko ka·ena man·aigen indiba office-o kam ka·giparang, chong·motan office assistant, peon aro uandakgiparang darangba kamtangtangko ka·na man·jawa,” ine NGEA-ni president parakataha.
Batanggimin somoirango GHADC-o kam ka·giparang ‘Silent Sit-in-demonstration’-ko dakaha indiba Mongolbar salonide uamang ‘Sit-in-Demonstration’ inemangmangsan banner-o seenba jingjengatanirangko dakangskagnok ineba NGEA-ni president Brithen Sangma parakataha.
GHADC-o kam ka·enggiparangna ja 43 batpile dormaharangko on·kujaengani gimin re·anggipa July 7 tarikonin NGEA-ni membor-rang, kamrangko ka·gija jingjengatanirangko dakengachim ine nikna man·a. GHADC-o kam ka·giparangna komibeoba bilsisani dormaharangko on·na ku·rachakaniko on·genchimosa jingjengataniko dontonggen ineba NGEA parakataha.
