SHILLONG: Garo Hills Autonomous District Council (GHADC)-o kam ka·enggiparang, ja 42 batpile dormaharangko man·kujae, neng·nikanirangko chagrongna nangtokengon, kam ka·enggiparangni mol·molanirangna nachil songjaengani gimin NPP-chi dilenggipa MDA sorkariko Opposition dolni dilgipa Mukul Sangma sing·doatenba, GHADC-o iandakgipa neng·nikanirangko namatna gisiko nangjaenganiara a·doko Autonomous District Council (ADC)-rangko bilgriatna miksonganiko mesokanisa ong·enga ine parakataha.
GHADC-o ong·enggipa obostarangko namatna gita sorkari, maming ja·kurangko de·jagenchimode Garo Hills-ni MLA-rangba, ramarangona re·ange jingjengatanirangko dakna draatako man·gen ineba ua aganaha.
GHADC-o ong·enggipa obostarangna NPP-chi dilenggipa sorkariko matnangatengon, GHADC-o kam ka·enggiparangna ja 42-ni dormaharangko on·na man·jaenganiara, GHADC-ko chalaienggipa Executive Committee-ni simsakgija aro an·tangtangni daitoko jako ra·na gisik nanggijaniko mesokanisa ong·a ine Sangma parakataha.
Sangma-ni aganani gitade, GHADC-o kam ka·giparang, ja 42 batpile dormaharangko man·tokkujae, tangka paisani gita aro gisikni gita neng·nikanirangko man·engoba a·dok sorkari, maming ka·sachakaniko mesokanian dongkujaengachim.
GHADC-o kam ka·giparang, an·tangtangni duk mikchiko mesokna gita tom·tome jingjengatanirangko dakengoba bang·a nokdangrangan, an·tangtangni nokdangrangna cha·ani ringanirangko on·anio neng·nikanirangko chagrongna nangtokengaha ineba Opposition dolni dilgipa aganaha.
GHADC-o kam ka·enggipa manderang indita neng·nikanirangko man·na nangengoba da·alonan sorkarioni maming u·iatani ba ja·ku de·anirang dongkujaenga ineba Sangma, an·tangni suk ong·gijaniko parakataha.
GHADC-ko ong·gija dake chalaisretani a·selan da·alo GHADC-o kam ka·giparangsan ong·aigija, Garo Hills-o songdongenggipa manderangba nangchakeaniko man·na a·bachengengaha ineba ua aganaha.
An·tangtangni man·na nangkuenggipa dormaharangko on·na gisik nangjaengani gimin batanggimin antirangonin GHADC-o kam ka·giparang, kamtangtangko ka·gija jingjengatengachim ine nikna man·a.
GHADC-o kam ka·giparang ja 42 batpile an·tangtangni dormaharangko man·tokkujaengon, komibeoba bilsisani dormahako on·chengna ku·rachakgenchimode jingjengataniko dontongna kusi ong·aigen ine Non Gazetted Employees Association parakmanahachim.