TURA: Garo Hills Autonomous District Council (GHADC)-o kam ka·enggiparang ja 44-ni dormaharangko man·kujaengani gimin kamrangko dontongate jingjengatanirangko dakengon, uamangni jingjengatanio A·chik Conscious Holistically Integrated Krima (ACHIK) dolba chakpaaniko parakataha.
GHADC-o kam ka·enggiparangna, uamangni man·na nangkuenggipa chu·gimik ja 44-ni dormaharangko on·china gita re·anggipa July 7 tarikonin jingjengatanirangko dakengachim aro da·o uamangni jingjengatani jagni gapna sipilengahachim.
Kam ka·giparangni jingjengatanio Non-Gazetted Employees Association (NGEA)-na chakpaaniko parakatengon, GHADC-o ong·enggipa obostara, kam ka·giparangna dormaharangko on·na man·jaenganisan ong·ja indiba ian Garo Hills-ko chalaianio mikkangchina kenchakna nanganiba ong·enga ine ACHIK dolni dilgiparang janapatenba, GHADC-o tangka paisa koros ka·ani aro hisap rakkianirangko namdapatjaskalde GHADC-ko mikkangchi chipna nangnaba gnang aro ian Indian Constitution-ni ning·o district council-rangna on·gipa Sixth Schedule-ko gimaatani ong·gen ine parakataha.
“Chinga ia somoio GHADC-ko kam ka·enggiparang, uamangni nokdangrang aro Garo Hills-ni manderang baksa bakrimaniko on·enga. GHADC-o kam ka·giparangna kakket bichalko on·kujaskal aro kamrangko namdapatna ja·kurangko de·chakatkujaskal ACHIK-ba pilak jingjengatanirangon bak ra·gen,” ine ACHIK dolni dilgiparang parakataha.