TURA: Garo Hills Autonomous District Council (GHADC)-ko chalaianio tangka paisa jakkalanirang namjani a·sel da·o kam ka·giparangna ja 44-ni dormaharangko on·na man·jae, kamrang bon·chongdikna nangengahani gimin A·chik jat aro a·songko chel·chakna Sixth Schedule-ni ning·o on·gimin district council-ko chipna nangahaode A·chik jat gimagnok ine Nokma-Sanirangoni saksa Dadenggre-ni Nokma Grenath A Sangma mikrakataniko on·angaha.
“District Council, ian A·chik jatni niam rongdik ong·a, uni gimin A·chik a·songni Nokma-Sanirang aro A·chik a·songo songdongenggipa pilakan GHADC-ni bon·aniko nangnikja. District Council bon·genchimode A·chik jatba gimagen maina District Council dongani giminsa da·alo A·chikrang jakgitele dongna man·enga. District Council bon·ahaode A·chik jat, gipin jatrangni niam sasonosa dongna nanggnok,” ine Nokma Grenath Sangma parakataha.
GHADC-o kam ka·enggiparangna ja 44-ni dormaharangko on·kujaengani gimin an·tangni suk ong·gijaniko parakatskaengon, “GHADC-o kam ka·giparang indita jana duk chake kamrangko ka·e on·aha indiba da·alonan uamangni man·gnirangko NPP-chi chalaienggipa GHADC-ni Executive Committee aro a·dok sorkari, on·na gisik nangjaenga. Iana A·chik a·songni Nokma-Sanirang gisiko sa·dikaniko man·a aro ka·tongo nangchakaniko man·a. Iandake kam ka·giparangni duk mikchini somoio bakrimaniko on·nasa da·alo A·chik a·songni bang·a Nokma-Sanirangba, jinma re·jomanio bak ra·paaha,” ine Sangma parakataha.
Mikkangchide NPP-ni dilanichi sorkari chalaianiko Nokma-Sanirang nangnikjaenga ine janapatskaengon, “Pilakan ma·sia NPP-ni EC-ko chalaianio bilsi 10 ong·aha aro uamangni chalaianio kam ka·giparangna ja 44-ni dormaharangko on·na man·chipjaenga. Mikkangchiba iandake GHADC-ko chalaiangkua ong·ode District Council bon·chongmotgen,” ine Dadenggre-ni Nokma mikrakataniko on·angaha.
Photo: GHADC-o kam ka·giparangni jingjengatanio bak ra·pae Nokma Sanirang, kobor ra·timgiparang baksa agangrikenga.