TURA: Garo Hills Autonomous District Council (GHADC)-o kam ka·enggipa manderang, ja 44-ni dormaharangko man·kujaengani gimin kamrangko dontongate jingjengatengani a·sel district council-ni kamrang bon·chongdikna nangengahani gimin Garo Students Union (GSU)-ni president Tengsak Momin, ia obostarangna, National People’s Party (NPP)-chi dilenggipa a·dok sorkariko matnangataha.
GHADC-o kam ka·enggiparangni man·na nangkuenggipa ja 44-ni dormaharangko on·china dabie, hajal kotok manderang, Tura-o re·jomaniko ong·atani ja·man GSU-ni president, NPP-chi dilenggipa sorkariko matnangataha.
“GHADC-o kam ka·enggiparangna hajalni hajal manderang chakpaanirangko on·enga maina Garo Hills-o ong·enggipa obostarangna darangan suk ong·tokjaenga. GHADC-o kam ka·enggiparang, ja 44-ni dormaharangko man·kujaengani gimin kamrangko ka·gija jingjengattokenga aro chingaba uamangni jingjengatanio gnigipa antionin bak ra·paaha. GHADC-o iandakgipa neng·nikanirangde ru·uta bilsirangna skangan a·bachengaha maina ua salrangonin kam ka·giparangna jasa ba jagnirangni ja·mansa dormaharangko on·aha aro da·o uamangni man·na nangani ja 44 gappilaha. Ian Executive Committee (EC)-ko chalaigiparangni, Meghalaya sorkarini aro an·chingni Chief Minister Conrad Sangma-ni chu·sokgijaniko mesokani ong·a,” ine Momin, kobor ra·timgiparangna aganaha.
“GHADC-o tangka paisarangko koros ka·anio simsakjani a·selan changsaode iandake bon·chongdikani cholrang donga ine chinga a·bachengonin aganengachim. GHADC-ba a·songo gitchambatsranggipa district council-rangoni damsa ong·a indiba da·onan GHADC-o service aro finance rule-rang dongkuja. GHADC-o ‘me·mang employee-rang’ donga aro mande saksaan dormaha ge·gniko cha·enga ine jangbingbanganirangko knana man·a indiba dal·batsranggipa neng·nikanide tangka paisa jakkalsretanian ong·a,” ine GSU president aganaha.
ANVC dolrang baksa ma·mong aro a·dok sorkarirangni songgigrikani bak gita GHADC-ni gong kror 100.71 tangkarangko man·sogipani bidingo toe janapatengon, “Ia project-rangoni mingsade GHADC-ni chu·sokanirangko gong kror 5.84 koros ong·e tarigipa jawilwatba ong·a. Anga an·tangba ia jawilwatko nimanaha aro iako tarianio lak 5-ba ong·jawa ine ma·sia. Ian GHADC-o tangka paisa jakkalsretaniko mesokani ong·a,” ine Momin parakataha.
Garo Customary Law (GCL)-ko pass ka·anio aro GHADC-na dingtang electoral roll-ko tarianio somoi ra·chae dongengani giminba ua a·dok sorkariko matnangataha.
Re·baenggipa November ja dipet a·dokni damgittam ADC-rango kam ka·giparangna a·dok sorkari, dormaharangko on·e dakchakgnok ine parakatahani gimin a·dokni Chief Minister-ko sing·doatengon, “Sixth Schedule-ni badia niamo pangchake ua (CM), district council-o kam ka·giparangna dormaha on·na am·enga? Par 12(a)-ko jakkale uamang iandakgipa kamna niamko pass ka·na man·a indiba da·o dipet anga an·tangde iandakgipa niamrangko nika dongkuja. Da·o GHADC-ni election sepangengahani giminsa iako a·dokni Chief Minister dakmikengama,” ine Momin matnangataha.
GHADC-o kam ka·giparang an·tangtangni man·na nangkuenggipa ja 44-ni dormahana indita duk chake jingjengatanirangko dakna nangengon, re·anggipa September-ni 1 tariko NPP-ni foundation day-ko Williamnagar-o manianio krorni kror tangkarangko NPP-ni dilgiparang koros ka·e roskaaha ineba GSU president, an·tangni suk ong·gijaniko parakataha.