Snaitang, 2028 Assembly poll-o susana nidingengachim
SHILLONG: Sukrobaro, Main Secretariat Office sambao gari neng·takate dongipaoniko airgun-rangko man·anio mongsonggipa matnangako man·gipa, Shillong Pohkseh-o donggipa Mebanshem Snaitang, jean an·tang baksa gisim ba·ra gangipa sak chi·gni manderangko body guard dake rimbite dongengachim, koboro gita ua re·baenggipa 2028 Assembly election-o susana gita nidingengachim.
Police-ni koboro gitade, ua saksa dal·drobaenggipa politician ong·a jen re·baenggipa assembly election-o susana gita chanchisoengachim ine parakangaha.
Indake air gun aro ugita dingtang dingtang silchidarerangko man·ani gimin dongipaoniko air gun-rangko man·anio mongsonggipa matnangako man·gipa, Mebanshem Snaitang baksa uni body guard dakgipa gipin sak chi·gniko police mnisalo rim·aha. Unigispeon indakgipa silchidarerangko maina ra·bitahachim, uarangni ja·pangko ja·mano talbate ma·sigen, maina da·o sing·sandianirangko dakenga ineba police parakaha.
Indake da·o chingni ma·sirikani gitade, ua an·tangko bil gnanggipa ine manderangna mesokna skahakon ine police chanchichipenga.
Uamango haida maiba namgijana miksonganiba dongachima, indake iandakgipa kamrangko ka·aha ineba police chanchichipenga, aro chu·gimik a·selrangkon ja·mano ma·sina man·aigen ineba police parakaha.
Snaitang haida gipin ong·gija kamrangko ka·anioba jak dongnaba dongam unigiminsak indakgipa air gun-rangko ra·bitenga aro an·tangko dal·gipa police dake dakjeenga ine Police chanchichipenga. Indake ong·engon, uko sing·sandiani ja·mano, police uko custody-o on·china gita bi·gen.
Koboro gita, air gun bolprakni daman komibeoba laksa mangni ong·a aro iani bidingo nambate ma·sina gita police, ra·sekgimin silchidareangko Forensic Science Laboratory-ona watatgen.
Snaitang, uni bodyguard-rang baksa gisim glass-rangko gario chatani gimin aro siren jakkalpilani gimin uni kosako MV Act-o pangchake mokordoma segataha.