SHILLONG: Meghalaya a·doko National People’s Party (NPP)-chi dilenggipa Meghalaya Democratic Alliance (MDA) sorkarini dake mesokani a·selan ia sal somoirango manderang, sakgipinrangni kosako bil mesokna jotton ka·anirangkoba nikna man·engaha ine Voice of the People’s Party (VPP) matnangatenba a·doko iandake VIP-rangni dakbewalko bon·atna ku·rachakaniko on·angaha.
Shillong songjinmani Main Secretariat sambao an·tangko dakjee mesokna jotton ka·gipa mande saksako adita silchidarerang baksa rim·na man·ani ja·man MDA sorkariko VPP matnangataha.
Iandakgipa mandeko rim·aniara, VIP-rangna on·enggipa cholrangko name am·sandijaengani a·selan ong·aha ine Nongkrem-ni MLA aro VPP-ni president Ardent M Basaiwmoit parakataha.
“Silchidare ra·bitgipa sak 12 manderangko rimbite, mande jinmani biaprango re·ruraaniara manderangko kenatna jotton ka·anian ong·a aro iandakgipa kamkode bobil dake chakatgiparang inen aganna man·gen ine East Khasi Hills a·jani SP aganaha aro ua kakketkon aganaha. Ian MDA sorkarini Meghalaya a·doko VIP-rangni dakbewalko ja·rikani a·selan ong·a,” ine Basaiawmoit aganaha.
Meghalaya a·doko sorkariko rikna man·ahaon iandakgipa VIP-rangni bewalko VPP gimaatgnok ineba Basaiawmoit, ku·rachakaniko on·angaha.
“2028 bilsio VPP, sorkariko rikna man·ahaon iandakgipa VIP-rangni dakbewalrangko bon·atgen ine chinga VPP, a·dokni manderangna ku·rachakaniko on·enga,” ine VPP president aganaha.
An·tangko dal·gipa mande ine dakjegipa mande saksako Sukrobar salo Shillong-ni police-rang, silchidare ra·bitgipa manderang baksa rim·na man·ahachim. Ia mandeoniko register ka·kugijagipa Audi A4, ML-05AF 0309 Scorpio gari aro T0922b ML7411A Toyota Innova gari baksana adita silchidarerangkoba police-rang man·aha.
Rim·a man·gipa mandeara, Shillong Pohkseh-oni Mebanshem Snaitang minggipa mande ong·achim.