SHILLONG: Assam aro Meghalaya a·doko Tourist taxi-rangko salgiparangni gisepo meligrikna man·jaengani gimin tourist taxi salgipa manderang baksa apsan asonge agangrikna nangenga ine a·dokni Tourism Minister Paul Lyngdoh, ku·pattianiko on·angaha.
Assam aro gipin biaprangoni tourist-rangko Meghalaya a·dokona salbaenggipa tourist taxi-rangko champengsona gita All Khasi Meghalaya Tourist Taxi Association (AKMTTA)-ni tik ka·aniko jegalatengon, gipin biaprangoni re·baenggipa taxi-rangko champengsogenchimode apsan daken Meghalaya a·dokoni re·angenggipa taxi-rangkoba gipin a·dokrango champengsoskaani cholrang dongaia ine Tourism Minister, mikrakataniko on·angaha.
Iandakgipa neng·nikanirangkode name chanchichenge aro apsan chanchirimesa namatna nanggen ineba Lyngdoh aganaha.
Gipin biaprangoni re·baenggipa tourist taxi-rangko champengsona AKMTTA-ni parakataniko jegalatengon, Assam a·dokoba apsan daken tourist taxi association-rang, Meghalaya a·dokni tourist taxi-rangko champengsoskana tik ka·aha ine Lyngdoh, kobor ra·timgiparangna parakataha.
“Assam-oni re·baenggipa tourist taxi-rangko Meghalaya-o champengsoa ong·ode Assam-oba apsan daken Meghalaya-ni taxi-rangko napna on·skajawa ine Assam-o taxi association-rangni ka·mikkenataniko an·chingna knana man·aha,” ine a·dokni Tourism Minister aganaha.
An·tangtangni nangnikenggipa kamrangni bidingo Cyril Diengdoh-chi dilenggipa committee baksa agangrikchina gita ua AKMTTA-ko didiataha.
“Sorkarini songe on·gipa committee baksa agangrikchina chinga uamangko didiataha. Uamang re·anggipa salrangonin apsan asonge chanchirimengachim indiba maini a·sel uamangni neng·nikanirangko namatna man·chipjaenga anga ma·sija,” ine Lyngdoh aganaha.