AMPATI: 2017 bilsio NLCPR-ni ning·o ma·mong sorkarini tangka paisarangchi chame on·gipa South West Garo Hills a·jani Mahendraganj Science & Commerce College aro Ampati Engineering College-ko da·alonan matchotchipkujaenga ine Niksamso Garo Community Organisation (NGCO) matnangataha.
Iani bidingo a·dokni Chief Minister aro Education Minister-na badi ka·e sedoatengon, ia college-rangko rikanio kamrang ja·manchakengani gimin aro kamrangko matchotsrangkujaengon maini gimin kam ka·enggipa contractor-na 85 percent tangkarangko gamaha, iani bidingo sandirokna gita inquiry commission-ko songchina NGCO dabiangaha.
NGCO-ni u·iatani gitade, ia minggni project-rangnan 2017 bilsio Non-Lapsable Central Pool of Resources (NLPCR)-ni ning·o tangka paisarangko chame on·aha aro Mahendraganj Science & Commerce College-na chamgipa gong kror 36.31 tangkarangoni gong kror 30-na baten tangka paisarangko contractor-na gamanaha aro Ampati Engineering College-naba gong kror 41-na baten tangka paisarangko chamatahachim.
Ia project minggnikon NGCO-ni dilgiparang re·ange nieani ja·man a·dokni Chief Minister aro Education Minister-na badi ka·doataha.
“Ia college damgnikon rikanirang namsrangja aro taripiltaina nangenga. Ia project minggnina sanction ka·ani da·o bilsi 8 gappilengaha indiba kamrang matchotkujaenga. Ia college-rangko rikanichi ian South West Garo Hills a·janasan ong·aigija Garo Hills gimiknan namgni ong·gnokchim indiba kamrangko name ka·jaengani a·selan jolni manderangna ka·dongani gri ong·enga,” ine NGCO-ni president Tengrak Marak parakataha.
NGCO-ni parakatani gitade, ia college damgnikon rikna gita BSS company-na pakwate on·ahachim indiba ia company, kamrangko name ka·na gisik nangjaenga.
Iandake Garo Hills-o lekka pora on·chakram biaprangko name kam ka·jaenganiara kraani ong·ja ine matnangatengon, iani bidingo sandirokatenba, ia college-rangko matchotningjaengani gimin aro kamrangko name ka·jaengani gimin contractor aro official-rangni kosako rakgipa ja·kurangko de·china NGCO dabiangaha.
