SHILLONG: Goods & Service Tax (GST)-ko nambate tarianichi a·songo songdongenggipa manderangni janggi tangani gadangko nambatatgen aro bading chiwalgiparangnaba altubatataniko on·gen ine Sukrobar salo, a·dokni Chief Minister Conrad K Sangma, Assembly-o aganaha.
Union Finance Minister Nirmala Sitharaman-chi dilgipa 56-gipa GST Council-ni ja·ku de·aniara India a·songni tax regime-o mingsa nambatsranggipa ja·ku de·ani ong·aha ineba Chief Minister mittele aganaha.
Ia council, 12 percent aro 28 percent slab-rangko bon·ate, iani pal 5 percent aro 18 percent-ni rate minggni baksana ta·makku, chu, dam rakgipa gari gorarangna 40 percent slab-rangko ra·gatskaaha ine janapatengon, ia gital damrangko re·baenggipa September 22 tarik dipet jakkalanggnok ine Chief Minister parakataha.
Ian gisik ra·na krabegipa ja·ku de·ani ong·aha ine ua, a·songni Prime Minister Narendra Modi, Union Finance Minister Nirmala Sitharaman aro GST Council-ni membor-rangkoba mittelpilangaha.
Ia gital damo manderangni nangchongmotgipa bosturangde dam komignok aro manderangni tangka chimonganirangko bariatskana man·gnok ineba ua aganaha.
Ia gital kajinarangko ra·gatanichi bading chiwale cha·giparang pilakan namgniko man·gen ineba ua aganaha.
Ia taridapgimin damrangko sorkari ra·chakaha ine janapatengon, ian bading chiwalaniko bilakbatate, a·dokni manderangna rang·speaniko on·gnok ine Chief Minister parakataha.