SHILLONG: Sorkario kam ka·gipa me·chikrang, mongsongbate ma·giparang, an·tangtangni gamchatgipa somoirangko dedrangna on·na man·na gita anti changantian baditaba kontarangko somoi on·na gita niamko tarichina, Meghalaya State Commission for Protection of Child Rights (MSCPCR)-ni chairperson Agatha K Sangma, a·dok sorkariko didiangaha.
Me·chik aro bi·sarangni kosako ong·gija dakanirangko nipilna gita Mongolbar salo tom·aniko ong·atanio MSCPCR-ni chairperson, jinma baksa chanchirimengon, District Child Protection Officer saksa, jean neng·nikanirangko man·enggipa bi·sarangna somoi on·e, an·tangni nokdangnan somoiko on·skana man·jaengachim, ia officer baksa agangrikani ja·man ua ia niamko ra·gatchina a·dok sorkariko mol·molna tik ka·angaha ine parakataha.
“Ia officer baksa chanchirimanio, anti changantian, sorkario kam ka·enggipa ma·giparangna, baditaba kontarangko, uni dedrang baksa ong·na somoiko on·na gita sorkarian skanggipa ong·na man·gen ine angni gisik chanchiani ong·kataha. Iandakgipa somoirango ma·giparang, an·tangtangni dedrangna, mai dakgipa kamrangoni chel·e dongna nanga aro mai dakgipa kamrango bak ong·na nanga, uarangko agan-skie on·skana man·gen,” ine Agatha aganaha.
Ian ma·a paa aro bi·sarangni gisepo agangrikani aro meli-nangrimaniko mangrakbatatna gita chonbegipa ong·genchimoba nambatgipa ku·pattiani ong·gen ine ua aganaha.
Bi·sarangni kosako ong·gija dakanirang batroroengani gimin an·tangni suk ong·gijaniko parakatengon, “Me·chikrangko aro bi·sarangko drae til·eka ine koborrangko knasoe an·ching bang·batan tunappiljaenga. Me·chik aro bi·sarangni kosako ong·gija dakanirangan an·ching pilakkon dongtoatjaenga,” ine Agatha aganaha.
Iani bidingo gisik on·e, dingtang dingtang dolrang baksa agan-chanchirimna ja·kuko de·chakatahani gimin ua dingtangmancha a·dokni Chief Minister Conrad K Sangma-koba mittelpilangaha.
Protection of Children from Sexual Offences (POCSO) Act-ni bidingo manderangna mikrakataniko on·na nangengani gimin janapatengon, ia Act-ni Section 43-ni ning·o manderangna ‘naljokani gnang dangtapani aro naljokani gri dangtapani’-ni gimin manderangna u·iatna nangani baksana Rule 3, jeon bilsini kri skie on·ani bosturangko tarina niam donani gimin MSCPCR-ni chairperson talataniko on·angaha.
Catholic-rangni skul aro hostel-rango Child Protection Policy-ko ra·gatahani gimin Catholic Bishops Conference of India-ko mittelpilangengon, ia kamko gipin skulrangoba daksningna man·gen ine Agatha, ku·pattianiko on·angaha.
