TURA: West Garo Hills a·jani a·kawe jolo, Gomaijhora-oni Garobasti-ona dakanggipa ramao wa·arangko kapengenba, mitam manderang kangdrana jotton ka·enga ine Fight Against Corruption (FAC) minggipa dol parakatenba, ia ramako niam gri kangdrana jotton ka·aniko champengchina West Garo Hills a·jani Deputy Commissioner-ko didiataha.
FAC dolni parakatani gitade, West Garo Hills a·jani dingtang dingtang biaprangko a·dokni gipin biaprang baksa nangdimeatna gita a·dok sorkari, Gomaijhora-oni Garobasti songona PWD ramako tarie on·aha aro ia ramako name rakkina gita da·o retaining wall-rangko tarina a·bachengatahachim.
Indake ong·engon, Gomaijhora-o songdongenggipa mitam manderang, an·tangtangni man·gnina chanchie, ia ramao retaining wall rikaniko champengenga aro ia ramani biaprangko kangdrana gita wa·arangchi kapengtokaha ine FAC-ni dilgiparang parakataha.
“Ia ramao wa·arangchi kapengenba kangdrana jotton ka·engani a·sel ramarang apchonatako man·e, re·ruraenggipa manderang neng·nikanirangko chagrongna nangtokenga aro ian re·ruraenggipa manderangna kenchakna nanganiba ong·enga,” ine FAC-ni dilgiparang janapatenba, iako uamang aro songni manderangba raken jegalenga ine parakataha.
Gomaijhora jolo songdongenggipa bang·a manderangan niamko pe·e, sorkarini ramao wa·arangko kapenge kangdrana jotton ka·tokenga ine janapatengon, iandake niam gri kangdrae ra·ako da·onin champengjagenchimode ja·mano gipinrangba apsan daken ia ramani a·arangko kangdrae ra·na jotton ka·gnok ine FAC parakatenba, ia ramao wa·a kapenge a·a kangdrana jotton ka·aniko ta·raken sandirokatenba, nanga gita ja·kurangko de·china West Garo Hills a·jani Deputy Commissioner-ko didiataha.
