SHILLONG: Voter ba pu·ongiparangko biming segatanio songni nokni dilgiparangna bilrangko on·dapanichi a·doko electoral roll-rangko namdapatna man·gen ine Budbar salo, Congress dol aganaha.
Iani bidingo kobor ra·timgiparangna talataniko on·angengon, Meghalaya a·doko Panchayati Raj system dongjani gimin pu·ongiparangko biming segatanio songni nokni dilgiparangna bilrangko on·dapskana nangenga ine Meghalaya Pradesh Congress Committee (MPCC)-ni secretary Manuel Badwar parakataha.
“Meghalaya a·doko Panchayati Raj system dongjani gimin pu·ongiparangko biming segatanio songni nokni dilgiparangna bilrangko on·dapskachina adita salrangna skang Special Intensive Revision (SIR)-ni bidingo tom·aniko ong·atanio chinga a·dokni Chief Electoral Officer (CEO)-na aganaha,” ine Badwar parakataha.
MPCC secretary-ni aganani gitade, pu·ongiparangko biming segatanio songni nokni dilgiparangna bilrangko on·na nanga ine gipin political party-rangni dilgiparangba aganpaaha.
Je manderangan Meghalaya a·doko pu·onna gita man·ja, uandakgipa manderang electoral roll-rango biming segatna man·jana gita aro gipin biaprangoni manderang, niam gri napsrukbana man·jana gita songni nokni dilgiparangna bilrangko on·na gita Election department, kamko ka·gen ine ia tom·anio CEO, uamangna ku·rachakaniko on·ataha ineba Badwar parakataha.
Dingtang dingtang a·dokrangona re·jojoe pu·ongipa manderangni gimin janapatengon, “Rahul Gandhi-ni campaign ka·anioba a·dok damsaoni damgipinona re·roroe pu·ongipa manderang bang·en donga ine nikna man·aha. Iandakgipa manderang da·al Delhi-o pu·onenga ong·ode, jagnini ja·man uamang Bihar-o pu·onskagen aro jagittamni ja·mande ia apsan manderangan, Karnataka a·dokoba pu·ongen. Ian badiaba political party-rangni tangka paisa on·e pu·onatenggipa manderangan ong·a aro iandakgipa manderangni a·selan election-ni kamrango neng·nikanirangko man·na nangenga,” ine MPCC-ni secretary parakataha.
