Chubata gadango lekka porani kamrangko nirokanggen
SHILLONG: Meghalaya a·doko higher education ba chubata gadangrango poraianiko dontonganirang batroroengani gimin chatro chatrirangni poraia dontonganiko champengna aro chubata gadango lekka porani kamrangko nirokna gita a·doko State Higher Education Council (SHEC)-ko songpiltaienga ine Budbar salo, a·dokni Education Minister Lahkmen Rymbui parakataha.
Budbar salo, SHEC-ni tom·aniko ong·atangani ja·man, kobor ra·timgipa manderang baksa agangrikengon, ia SHEC-ko 2018 bilsion Assembly Act-ni ning·o songahachim aro da·oba ia council-ko, a·dok sorkarina ku·pattianirangko on·na aro lekka porani kamrangko nirokna gita songpiltaiaha ine Rymbui parakataha.
Education Minister-ni aganani gitade, chubata gadangrango poraianirangko dontonganirang batroroengani giminan sorkari, chatro chatrirangna cholrangko on·na gita diltugipa biaprang, jekai Shangpung, Khliehriat, Nongtalang, Mawphlang, Mawsynram, Rongjeng, Patharkhmah, Umsning, Dalu aro Chokpot gita dakgipa biaprango People’s College-rangko kulie on·aha aro unbaksana Captain Williamson Sangma State University aro Engineering College-koba kuliaha.
Bang·bata chatro chatrirangan tangka paisani gita neng·nikanirangko chagrongna nangengani gimin a·dok sorkari scholarship-rangkoba bariataha ine janapatskaengon, 2020 bilsio a·dok sorkari, A, B, C, D group-rangna scholarship-ko gong 15,000-oni gong 35,000-ona, merit scholarship-ko primary-na gong 100-oni gong 500-ona aro upper primary-na gong 150-oni gong 700-ona bariataha ine Rymbui aganaha.
Ia bilsio a·bachengatenggipa Chief Minister’s Scholarship Scheme-chiba, chatro chatrirangna poraianirango bang·en namgni ong·gen ineba Rymbui aganaha.
Class XII-ko pass ka·gipa chatro chatrirangoni 82.3 percent-de, Science aro Commerce stream-rang dongjani a·sel Arts stream-ko ra·na draatako man·enga ine janapatskaengon, iani bidingo a·dok sorkari, pilak sorkari secondary skulrangkon higher secondary-ni gadangona ra·doataha ine Education Minister parakataha.
Education Minister-ni aganani gitade, Meghalaya a·doko dam 25 college-rangsan NAAC-ni accreditation-ko man·giparang ong·aia aro dam 71 college-rangde NAAC-ni accreditation-ko man·kugijagiparang ong·a.
“Uni giminsa ia college-rangna NAAC accreditation-ko bi·na gita SHEC-na gong kror 1-ko on·china gita chinga a·dok sorkariko mol·molna tik ka·angaha,” ine Rymbui aganaha.
