SHILLONG: Sukrobar salo Meghalaya Cabinet tom·aniko ong·atangenba, New Shillong Township-na a·a ra·dapani, Meghalaya Ministerial District Establishment Service Rules 2017-ni Rule 6(d)-ko taridapani, aro a·dokni fiscal deficit limit-ko nipiltaiani baksana adita niamrangko ra·chakangaha.
Cabinet tom·ani ja·man kobor ra·timgipa manderang baksa agangrikengon, New Shillong Township-ni ning·o Administrative City aro Knowledge City-ko nangdimatna gita rama tarina Tynring-o acre 35 a·ako brena tik ka·aniko Cabinet ra·chakangaha ine a·dokni Cabinet Minister Wailadmiki Shylla parakataha. Ia a·aon Central Jail-ko apjitna gitaba jakkalanggen ine Shylla aganaha.
“New Shillong-ko dal·batatanio ian mongsonggipa ja·ku de·ani ong·enga. Administrative aro Knowledge City-ni gisepo re·a doaniko nambatatna gita ia a·arangko nangdapenga,” ine Shylla aganaha.
Ia apsan somoion a·dokni Cabinet, Group D post-rang ba kamrangko sualani niamrangko talbatatna gita Meghalaya Ministerial District Establishment Service Rules 2017-ni Rule 6(d)-ko taridapnaba ra·chakangaha.
Ia niamko taridapanichi dingtang dingtang Office Memorandum (OM)-rangni bidingo jajaatanirangko namatna man·gnok ine janapatengon, regular casual worker-rangna Group D kamrangoni 50 percent-ko chame Office Memorandum-ko 1996 bilsio on·aha indiba 2017 bilsio on·taigipa Office Memorandum-ode, Group D-ni pilak kamrangkon porikkarangko ong·ate ra·china gitasa niamko donskaahani gimin ian manderangna jajaatani ong·engachim ine Shylla aganenba, 1996 bilsini Office Memorandum-kon ja·rikpiltaina gita da·alo Cabinet, ia niamo taridapanirangko ra·chakangaha ine parakataha.
Una agreba, Meghalaya Fiscal Responsibility and Budget Management (FRBM) Act, 2006-ni taridapna gitaba Cabinet ra·chakangaha aro ia niamko taridapanichi a·dokni fiscal deficit ceiling-ko GSDP-ni 3 percent-oni 3.5 percent-ona bariatgnok ine Cabinet Minister parakataha.
Indake ong·engon, Justice Shivaji Pandey-ko Meghalaya State Consumer Disputes Redressal Commission (MSCDRC)-ni president dake songpiltaianikoba ia tom·anio Cabinet ra·chakangaha ine Shylla parakataha. Ia commission-o membor sakbriko, chong·motan Major Unsambyntalang Nongsiej, Rupa Paul Chaudhuri, Nelisa F Kharshiing and Bijoy A Sangma-ko ra·dapna gitaba Cabinet minge donangaha.
