TURA: Meghalaya a·dokni Samagra Shiksha Abhiyan (SSA) skulrango skigiparang, October jani dormaharangko man·tokkujaengani a·sel neng·nikanirangko chagrongna nangenga ine All Garo Hills SSA School Teachers Association (AGHSSASTA) parakatenba, October jani dormahako ta·raken on·china didie, a·dokni Education Minister Lahkmen Rymbui-na sedoataha.
Education Minister-na sedoatgipa chittio AGHSSASTA-ni parakatani gitade, SSA skulrango skigiparangna October jani dormahako on·na gita November-ni 5 tarikon Education Department-ni Deputy Secretary, ge·etaniko on·atmanahachim indiba dingtang dingtang Block aro District official-rang Salary Meg-SIMS-ko verify ka·na man·jaengani a·sel aro Salary Meg-SIMS Verification-ni bidingo sorkari official-rang, skigiparangna maming skie on·anirang dongjani a·sel da·onan dingtang dingtang a·jarango SSA skigiparang, October jani dormahako man·tokkujaenga.
Dedrangrangni bon·kamgipa porikkarang da·o ong·na siengahani gimin skul fee-rangko matchote gamna nangtokengaha ine janapatengon, dormaha on·anio official-rangni chagrongna nangenggipa neng·nikanirangko ta·raken niatchina aro skigiparangni dormahako ta·raken on·china AGHSSASTA, a·dokni Education Minister-ko didiataha.
