TURA: India sorkarini a·bachengatgipa Pradhan Mantri Kisan Samman Nidhi (PM-KISAN) scheme-ni chang 21-gipa instalment distribution program-ko South Garo Hills a·jani CAU-Krishi Vigyan Kendra (KVK)-oba live mesokangaha aro ia program-ni ning·o sak 193 game ge·e cha·giparang, sakprako gong 2000 ka·e Direct Benefit Transfer (DBT)-ko man·aha.
Ia DBT program-ko a·songni Prime Minister Narendra Modi, a·song gimiko game ge·e cha·enggipa kror 9 manderangna namgni ong·na gita a·bachengataha.
PM-KISAN scheme-ko 2019 bilsio a·bachengataoni gong kror lak 3.2-na baten game ge·e cha·giparangna sualatna man·aha aro ia tangkarangko changgittam dake game ge·e cha·giparangna bilsio gong 6000 ka·e on·ataha.
South Garo Hills a·jani KVK-o ia program-ko ong·atanio, Chokpot C&RD Block-ni ning·o donggipa Dagal Gopgre songni Nokma Grester M Sangma, mongsonggipa sokgipa ong·e bak ra·angaha aro unbaksana Chokpot C&RD Block-ni Assistant Technology Manager Kenyrocks Marak aro gipinrangba dongpae bak ra·angaha.
Ia program-ko ong·atanio, SGH-KVK-ni Head I/c Dr Tanya R Marak, SMS (Fisheries) Thongam Monika Devi, Farm Manager Charish P Marak aro gipinrangba, game ge·e cha·giparangna agan-talatanirangko on·angaha.
