AMPATI: Garo Hills-ni bang·bata biaprangon Panchayati Advancement Index (PAI) survey ka·aniko Nokmarang jegalgrimtokengani gimin South West Garo Hills a·jani pilak A·king Nokmarangna ia PAI survey-ni bidingo talataniko on·na gita Budbar salo, South West Garo Hills District Administration, dingtangmancha tom·aniko ong·atangaha.
Ia tom·aniko ong·atanio, SRES-DID-ni Project Director RZD Shira, Betasing C&RD Block-ni BDO CRN Sangma, Purakhasia Block-ni BDO AK Marak, Nokma Council-ni membor-rang aro gipinrangba bak ra·angtokaha.
Ia tom·anio dingtang dingtang official-rang aganprakengon, PAI survey ka·ani miksongani, bewalrang aro gamchatgipa ong·ani bidingo agan-talate on·angtokaha. Songantion sorkarini kamrangko nipilna aro kam ka·anirango kolgapgijanirang dongama dongja, uko ma·sie ra·na gitasa ia survey-ko ka·enga ineba official-rang agan-talate on·angaha.
Adita salrangna skangsan, South West Garo Hills a·jani ning·o donggipa dingtang dingtang a·kingni Nokmarang, Nokma Council Damalgre unit-ni office-o tom·aniko ong·atangenba, sorkarini ka·enggipa PAI survey-ko jegalgrimtokahachim ine nikna man·a.
Meghalaya a·dokde Tribal a·doksa ong·ani gimin pilak kamrangkon Autonomous District Council (ADC)-rang gitasa ka·a aro Indian Constitution-ni Sixth Schedule a·jarangode iandakgipa survey-rangko skatang ka·na man·ja ine Nokmarang jegalgrimtokaha.
Ia tom·anio official-rangni talate on·aniko man·ani ja·man, songni nokni namgnina pilak Nokmarangan, PAI survey-ko name matchotatna man·na gita bakrimaniko on·na ku·rachakangtokaha.
