Sorkari program-rangona okamrongja ine Dadenggre MLA suk ong·gijaniko paraka

TURA: Dadenggre constituency-ni ning·o sorkarini dingtang dingtang program-rangko ong·ataniona okamrongjaenga ine Dadenggre-ni TMC MLA Rupa M Marak, suk ong·gijaniko parakatenba, iani bidingo a·dokni Chief Minister Conrad K Sangma aro NPP-chi dilenggipa a·dok sorkariko sing·doataha.
Marak-ni parakatani gitade, iandakgipa sorkarini program-rangona a·dok sorkari aro district administration, opposition MLA-rangkode okamrongja indiba apsan program-rangko ong·atanion, ua constituency-o maming namroro silroroanirang dongjaenga ine a·dokni Chief Minister, Opposition MLA-rangko matnangskaronga.
Adita salrangna skang, Jengjal Police Station-ni gital building-ko nokdonggaanioba uko okamatjahani gimin suk ong·gijaniko parakatengon, ian badiaba party-ni program ong·jachim indiba sorkarini program-sa ong·ani gimin local MLA-de dongpana nangachim ine Marak parakataha.
A·dok sorkari aro Airports Authority of India (AAI)-ni gisepo Baljek Airport-ko taridapna Memorandum of Understanding (MoU)-o soi ka·grikani program-ko ong·atgipani bidingo janapatskaengon, ia program-onaba uko sorkarioni aro district administration-oni darangba okamatjaha indiba salsa skang attamo uni ripengrangsa una ia program-ni gimin u·iate, ua ia program-ona an·tangan re·bae bakko ra·eaha ine Dadenggre MLA parakataha.
“Anga saksa Dadenggre constituency-ni MLA ong·e, constituency ning·o ong·atenggipa sorkari program-rango bak ra·pana nangchongmota indiba a·dok sorkari aro district administration-ni angko nichanggalrongani gimin anga da·alo suk ong·ja,” ine Marak parakataha.
“Sorkari program-rangona angko okamgijaniara changsa changgni ong·ja indiba sorkari program-ko ong·ata changantian angko nichanggalrongani giminsa anga suk ong·ja. Ringgi Dolongko rikna pangchakaniko songani somoioba angko okamjaha aro ua somoio local MLA-kon okampilgija, Dadenggre-ni gitcham MLA James Sangma-kosa chief guest dake okamskaaha. Bang·a manderangan angko maini gimin dongpaja ine sing·attokaha aro uamangna angko okamjani gimin re·angna man·jaha ine aganchakna nangaiaha,” ine Dadenggre-ni TMC MLA parakataha.
“Maini gimin angni kosako iandake sorkari aro district administration-ba kamko mesokenga anga ma·sija indiba haida angni manderangna anga Assembly-o ku·rang on·engani giminsa angko iandake jakkalengakon ine anga chanchia. Anga an·tangni constituency-na aro constituency-ni manderangna ku·rangko on·na gitasa dilgipani kamko ra·aha aro dilgipa ong·e angni kamde angni manderangna ku·rang on·anian ong·a,” ineba Marak parakataha.
Sorkari program-rangko party-ni program dake ra·jachina didiatengon, “Anga local MLA ong·e kamtangko ka·gen aro sorkariba iandakgipa program-rangona local MLA-ko okamate kamtangko ka·na nanga. Ia program-rangde party-ni program ong·ja indiba sorkarini program-rangsa ong·ani gimin local MLA-de dongna nangchongmota,” ine Dadenggre MLA parakataha.