SHILLONG: Meghalaya a·doko, mongsongbate skotong Shillong songjinmani badiaba badiaba biaprango, bi·sarangko drugs ba pekatgipa samrangko palatna jakkalenga ine a·dok sorkari parakataha.
Bristibar salo, Anti Narcotics Task Force (ANTF)-ni official-rang baksa tom·e chanchirimani ja·man, kobor ra·timgiparangna talataniko on·angengon, Shillong songjinmani Mawlai jolrango, bi·sarangko drugs palatna jakkalenga ine koborko man·soaniara namen jajrengna nangani ong·enga ine Social Welfare department-ni Adviser Paul Lyngdoh parakataha.
A·doko pekatgipa samrangko jakkalani aro badingsrukaniko champengna gita Meghalaya Police, ANTF aro jolo songdongenggipa manderang, ku·cholsan ong·e kamko ka·na nangenga ineba ua aganaha.
Shillong songjinmao Village Defence Party (VDP)-rang chu·onga gita dongja ine janapatengon, Shillong-o songdongenggipa sak lak 6-mangni gita manderang donga indiba VDP-rangde dol 12-san dongaia ine Lyngdoh parakataha.
A·doko drugs jakkalanina aro badinganina mingsingbatsranggipa biaprangoni Mawlai-ba damsa ong·enga ine janapatengon, a·ja ge·antiaon pekatgipa samrangko jakkalanirangchi neng·nikanirangko chagrongna nangenga ine Lyngdoh aganaha.
Shillong songjinmani mitam biaprango, sam badingsrukgipa manderang, dingtang dingtang cholrangchi drugs-rangko badingna jotton ka·enga ine ia tom·anio ua ANTF official-rangna u·iataha.
Ia biaprangko parakna gita jechakangengon, ia jolrango obostarang namjabatroroengani gimin ua ANTF aro a·dokni police-rangko nangrime kam ka·china aganaha ine Lyngdoh parakataha.
