RONGJENG: East Garo Hills a·jani Rongjeng-Darugre jol gita tarina sienggipa National Highway (NH-217) ramana a·arangko ra·anio tangka paisa gamanirang tik ong·ja aro a·arangko ra·anio dingtanganirang donga ine jolo songdongenggipa manderang matnangataha.
Koborko on·ani gitade, iani bidingo jolo songdongenggipa manderang, district administration aro NHIDCL-naba baditaba chang u·iatahachim indiba da·alonan uamangni neng·nikanirangko namatna ja·ku de·anirang dongkujaenga.
NH-217 ramana a·a ra·anio an·tangtangni bagan-barirangko gimaatna nangenggipa manderang, iana skangba deputy commissioner aro Tura-ni MP Saleng A Sangma-na u·iatahachim ine kobor on·aha.
Kobor on·timgiparangni u·iatani gitade, ia ramana Rongjeng Deficit Higher Secondary skulni a·arangko ra·anio skanggipa toaniode skulni ata bighamangni gita gimaatna nangengachim indiba ja·mano gital dake totaianiode ia skulni higher secondary section-koba man·chape bigha-sana baten a·arangko gimaatna nangskaengaha.
“Skanggipa a·a toaniode skulni mikkangosan marker-rangko donaiahachim aro unode skul nokrangna maming nangchakeani dongjaengachim indiba ja·mano gital dake rimit rongchi marker-ko saltaion, da·o ia skulni higher secondary section-koba man·chapengaha,” ine skulni headmaster parakataha.
Ia ramana skulni a·ako ra·anio bagan barirangkosan gimaatenga ong·ja aro a·bachengo ia skulna tangka paisa gamna tik ka·gipara gong 60,000-san ong·aiani gimin ian tangka paisa gamanioba on·stekani gita ong·enga ine nikna man·aha. Ia skulara ramani sambaon aro Rongjeng bazaar-ni sambaon ong·ani gimin namen dam rakgipa a·arangsa ong·achim ineba kobor on·timgiparang u·iataha.
Iani bidingo skulni dilgiparang, Williamnagar-o donggipa Revenue department-ni official-rangko gronge agangrikon, ia biaprangara sorkarini a·arangsa ong·ani gimin uamango sing·chengani kattaba dongjachim inesa official-rang aganchakaiaha ine kobor on·aha.
“Ia skulara deficit skulsa ong·a aro sorkarini gam ong·jachim. A·bachengo ia ramana a·ako on·na gita soi ka·ani ja·man chinga managing committee-ni gitaba tom·e chanchirimon, chinga sorkarini on·gipa compensation-ko ra·chakna jechakenba angni uamangna a·a on·na tik ka·akoba ra·pilna tik ka·ahachim,” ine skulni headmaster parakataha.
Iani ja·man skulni mikkango dokkan dakenggipa mande saksaba, an·tangni dokkanko gimaatna nangani ja·manba tangka paisarangko man·jaha ine parakataha.
Iasan ong·aigija, samba jolo donggipa Meghalaya Apex Bank-ba apsan daken office gimikko ia ramana gimaatna nangengaha ine kobor on·aha.
Unbaksana Upper Rongjeng, Darugre aro uandakgipa biaprango songdongenggipa manderangba, ia ramana an·tangtangni bagan barirangko gimaatna nangengaha aro chu·onga gita tangka paisarangko man·tokjaenga ine matnangataha.
