SHILLONG: Meghalaya a·doko donggipa National Commission for Scheduled Tribes (NCST) office ‘chondugaa’ aro ia office-o kam ka·giparangba sakgittamsan dongaia ine Tura-ni MP Saleng A Sangma, suk ong·gijaniko parakataha.
Tura-ni MP Saleng Sangma, jean Parliamentary Standing Committee on Personnel, Public Grievances, Law & Justice-ni membor-ba ong·enga, re·anggipa Sombar salo, Shillong-o donggipa NCST North East Regional office-ko nina re·angaha aro ia office-ko chalaianio an·tangni chu·ongnikgijaniko parakaha.
Shillong-o NCST-ni regional office-ko chalaienga ine Parliamentary Standing Committee-ni tom·anio u·iataniko man·ani ja·man ua ia office-ko an·tangan re·ange nina tik ka·aha ineba Sangma parakataha.
“Ia office-ona re·angon, iano sakgittam manderangsan kam ka·enga ine anga nikna man·aha. Kam ka·gipa sakgittamoni saksade contractual aro sakgnide ongipa gadangni official-rangsa ong·a,” ine Sangma aganenba, ia office-ara salgro salaram jolo damsamangmang NCST office ong·a indiba iano, Scheduled Tribe (ST) aro Scheduled Caste (SC)-rangni kosako ong·gija dakgipa ming 27 ba 28 case-rangkosan segatkuaienga ine suk ong·gijaniko parakataha.
Salgro salaram jolrango iandake ST aro SC-rangni kosako ong·gija dakgipa ming ritchani ritcha case-rangko report ka·enga ine janapatengon, ia office-ko name chalaijaengakon aro ia office-ko chalaiani bidingo darangba ma·sijakon ine Tura MP parakataha.
Salgro salaramni dingtang dingtang biaprango, drae til·ekani, so·sojengjeng ong·ani aro Assam-Meghalaya simarango manderangko Assam police-rangni so·ote galanirangko toe janapatengon, Shillong donggipa ia NCST office-ni bidingo Parliamentary Standing Committee-na u·iatgen ine Sangma parakataha.
Ia regional office-ko ru·uta bilsirangna galchipe donaha ine janapatskaengon, ia NCST office-ni bidingo ua bilaken ma·mong sorkarina ku·rangko on·gen ine Tura MP, ku·rachakaniko on·angaha.
