India a·songko tang·doatna gita officer-rangko bakrime kam ka·china didianga
BAGHMARA: Mongolbar salo, Housing aro Urban Affairs-ni Union Minister of State (MoS) Tokhan Sahu, South Garo Hills a·jaona re·baenba, a·jao ka·enggipa ma·mong sorkarini dingtang dingtang scheme aro project-rangko nipilna gita South Garo Hills a·jani officer-rang baksa Baghmara-ni Circuit House Conference Hall-o tom·aniko ong·atangaha.
Ia tom·anio, South Garo Hills a·jani Deputy Commissioner Sumit Kumar Singh, ADC-rang aro gipin official-rangba bak ra·angtokaha.
Ia tom·anio Union Minister of State Tokhan Sahu, officer-rangna aganprakengon, lekka pora aro sanna banani kamrangko mongsongbatgipa ong·e ra·china didiangenba, a·jao songdongenggipa bi·sa sakanti aro mande sakantian namgipa lekka pora aro sanna banani cholrangko ra·na man·na nanga ine aganaha.
Viksit Bharat-ni ning·o ma·mong sorkarini dakchakanichi a·songni ja·manchakbatsranggipa biaprangkoba dingtangatna gita Prime Minister Narendra Modi-ni niksamsoaniko janapatengon, ‘Sabka Vikas Sabka Vishwas’-ni miksonganian a·songni pilak kona noksikrangona namroro silroroaniko sokatani ong·a ine Sahu aganaha.
India a·songko developed country ba tang·dogimin a·song ong·atna gita pilak officer-rangkon ku·cholsan ong·e kam ka·china gitaba ua didiangaha.
Ia tom·anio South Garo Hills a·jani Deputy Commissioner, Power Point Presentation-ko dakanichi, South Garo Hills a·jao jako ra·e ka·enggipa ma·mong sorkarini dingtang dingtang scheme aro project-rangni gimin Union Minister of State-na talate on·angskaaha.
Ia tom·anio ma·mong sorkarini, Pradhan Mantri Awas Yojana (U) 2.0, Ayushman Bharat Yojana, Pradhan Mantri Jan Dan Yojana, MGNREGA, Faisal Bima Yojana, PM SVANidhi aro gipin scheme-rangni giminba Union Minister baksa chanchirimangaha.
Ja·mano Union MoS, Baghmara Housing Complex, Bolsal A·ding, Baghmara BSF Camp, Wagesik Baghmara-o donggipa BSF Check Post aro Rangku Memorial Girls Secondary School-onaba re·angaha aro ia biaprango, dingtang dingtang self help group (SHG), PMAY aro PMEGP scheme-ni beneficiary-rangkoba gronge agangrikangaha.
