Official garirango niamgri flasher, siren aro glass gisim chataniko champengata
SHILLONG: India a·songo, skanggipa a·dok ong·e Meghalaya a·dokan gisik ra·na kragipa itihasko segataha, jeon permission ba bil man·gijade Chief Minister-ni gari mangmangoba, ramram manderangni gario gitan gitchak beacon-rangni palo jakkalgipa flasher-rangko chatna man·jawaha ine jinmani mikkango parakaha.
Indake Butbaro Cabinet tom·anio gital Standard Operating Procedure (SOP)-ko parakaha, jeon Chief Minister Conrad K. Sangma an·tangkoba ia gitalgipa niamo man·chapataha.
“Flasher-rangko jakkalna gita Chief Minister-ni Office mangba Transport Department-oniko niam gita permission ba bilko ra·chengna nanggen” ine ua parakaha.
Bil on·ako man·gijagipa manderangni, VIP-na on·gipa bilrangko jakkalsretani a·selrangko bang·en nikengahani gimin, uarangna jajrenge ia gitalgipa SOP-ko ra·gataha. Jakkalna bil man·gijagipa manderang glass gisim, siren indakgiparangko jakkalsretengani gimin, uandakgipa manderangko nirokna gita Sorkari iandakgipa niamrangko ra·gataona sokaha ine CM aganaha.
Niam gital ra·gatanio, red beacons ba gitchak light-ko chatanikode India a·song gimikon champengataha, aro da·o flasher-rangkoba Transport Department-ni bil on·ako man·gijade jakkalna man·jawaha.
Glass gisimrangko Z+ aro Z category-nasan jakkalna on·a, unigisepon minister aro MLA-rang sanaba jakkalna nangenga ong·ode Principal Secretary (Home)-ni re·dilgipa dolsa high level committee-ko grongenba uni nangnikaniko aganenba bi·na man·a.
Unomitingo, siren-rangko police garirango, ambulance-rango, wa·al kimitna jakkalgipa garirango aro VIP/VVIP-rangna jakkalgipa garirango jakkalna on·a.
Indake ong·engon, Transport Department-ni seoke on·gipana agrede nameplate-rangkoba “Chairman”, “Advisor”, “Member of Board” ba “MLA”-rangni jakklanikoba champengataha.
Unomitingo, sawarang uamangni garirango nameplate-rangko jakkalna man·genchim, uarangko Transport Department-onisa niroke seoke on·gnok.
Unigimin Transport Department-ni bil on·ako man·gijade darangkoba iandakgiparangko jakkalsretna on·jawajok ineba Chief Minister Conrad Sangma aganaha.
