2027-na skangan Tura-o electric auto aro bus garirangko a·bachengatna miksongenga: CM
TURA: ‘Tura Beautification: Heal the World’ ine pangchakaniko donenba Sukrobar salo Tura Municipal Board, dingtangmancha program-ko Tura-ni District Auditorium-o ong·atangaha aro ia program-ko ong·atanio a·dokni Chief Minister Conrad K Sangma, mongsonggipa sokgipa ong·e bakko ra·angenba, re·baenggipa 2027 bilsio a·doko sokachakna sienggipa National Games-na tarisamsoani bak gita aro Tura songjinmako gital dake taridapna niksamsoaniko chu·sokatna gita dingtang dingtang kamrangko jinmana parakangaha.
Ia program-ko a·bachengatanio, Tura Municipal Board (TMB)-ni Chairman JD Sangma, rimchaksoani kattarangko aganangaha aro uni ja·man, West Garo Hills a·jani Deputy Commissioner Vibhor Aggarwal, program-o bak ra·enggipa manderangna mande ra·pilskaaniko dakangaha.
Ia program-ko ong·atanio, dingtang dingtang Area Development Committee (ADC)-ni dilgiparang, gittimtangtango namroro silroroaniko jinmana agan-talate on·angaha aro ia program-ko ong·atanio MGMP-ni git ring·giparangba gitrangko ring·e manderangko an·saoatangaha.
Ia tom·anio a·dokni Chief Minister, jinmana aganprakangengon, a·doko namroro silroroaniko ra·bana gita sorkarini miksongenggipa kamrangko parake on·angaha.
Tura jillao gong kror 145-ni five-star hotel-ko Park Hotel brand baksa nangrime rikna Hilton Group, tender-ko man·aha ine janapatengon, ia five-star hotel-ko ja 36-ni gisepon matchotna ka·dongenga aro ian Garo Hills-o skanggipa five-star hotel ong·gen ine Chief Minister parakataha.
2027 bilsio ong·atna sienggipa National Games-ni mingdok ba mingsni kal·susaanirangko Tura-o sokachakna tarisamsoenga ine janapatengon, kal·susagiparangna aro official-rangna komibeoba ge 600 kuturirangko tarisona nangenga aro iana 60 percent subsidy donggipa homestay scheme-ko sorkari a·bachengatahani gimin ian National Games-nasan ong·aigija ja·mano tourism-ni kamrangna bang·en dakchakani ong·gen ine Chief Minister parakataha. Ia kamni ning·o komibeoba ge 350 kuturirangna dakchakaniko on·na man·na gita sak 30 ba 35-mangni gita gital dorgasto galgiparangko ta·rakbatatchina Chief Minister didiangaha.
Tura jillao re·a doani kolrangko nambatatna aro samtangtango ong·telaigiparangko ripingna kam ka·ani bak gita 2027 bilsina skangan electric auto aro bus garirangko a·bachengatna miksongenga ineba Chief Minister parakataha. Petrol auto-rangko EV model dake tarina bakan auto association-rang baksa tom·e chanchirimanggen ineba Chief Minister parakataha.
Tura-o children park-rangko, bangbang ong·gipa biaprangko aro budepa butchumarangna rochakani biaprangko tarina gita a·a nokgiparangko aro dingtang dingtang dolrangko sorkari baksa bakrimchinaba ua didiangaha.
A·doko drugs ba pekatgipa samrangko jakkalanirang batroroengani gimin ja 3 ba ja 6-ni gisepon a·ja ge·antion rehabilitation centre-rangko kulignok aro iandakgipa kamrangko nambate nirokna man·na gita dingtang dingtang biaprango CCTV camera-rangko donan baksana street light-rangko taridape, songo noko nirokna village defence party (VDP) gita dakgipa dolrangko songe on·anggen ineba Chief Minister parakataha.
Ia program-ko ong·atanio, Tura jillako nitobatatna aro rongtal an·talatna gita dingtang dingtang area development committee-rangna gong lak 38-ni cheque-rangkoba Chief Minister sualataha.
Ia tom·anio, Tura Municipal Board-ni Senior Medical & Health Officer Dr Amanda Salchira W Momin, mittelpilani kattarangko aganangskaaha.
