Siju (SGH): Siju bajar aro Dobakkol-ni gisepgriko tarigipa PMGSY rama nosto ong·gipako taripile on·china South Garo Hills-ni PWD-na Siju Unit-ni Garo Students’ Union seachi u·iataha.
“Siju bajar-oni Dobakkol-ona tarigipa rama dingtang dingtang bakrango bilongen nosto ong·tokaha. Mitam bakrangode indakpile nosto ong·ade ong·ja indiba bang·bata biaprangon nosto ong·bataha aro songre songgabatna aro garirangko salna bilongen neng·nikengaha,” ine general secretary Welbing Sangma u·iataha.
Ia rama-an mongsonggipa eco-tourism biaprangona aro gipin biaprangona dakanggipa rama ong·e songni nokni manderangna gamchatgipa rama ong·a. Nosto ong·enggipa ramarangni a·sel joltangni manderangni songgabatanina aro tourism kamrangna neng·nikaniko man·enga.
“PMGSY guideline-rango pangchake, Defect-Liability Maintenance Period-ni ning·o matchotani ja·man bilsi 5-na ramako name dake rakkiangna aro taripile on·a executive contractor-ni daito ong·a. Nosto ong·gipa bak ramarangko senggnangan man·a dipet tarie on·china nangchongmotgipa contractor-ko ge·etchina uamang mol·molangaha,” ine GSU agandapangaha.
