SHILLONG: Meghalaya a·doko songdongenggipa manderangni nanganirangko chu·sokate on·na MLA-rangna on·enggipa scheme-ni tangka paisarang chu·ongjaenga ine Mawsynram constituency-ni MLA aro State Planning Board-ni Co-Chairman Ollan Sing Suin parakatenba, ia scheme-ni tangka paisarangko bariatchina sorkariko didiataha aro apsan somoion ia MLA scheme-ko nambate chu·sokatchina MLA-skarangkoba mol·molataha.
MLA scheme-rangosan ong·aigija MLA-rangni pilak kamrangon, manderangna parak ong·ani dongna nanga ineba ua aganaha.
Suin-ni parakatani gitade, da·o dipet MLA sakprakan bilsio kror 2.5 ka·e MLA scheme-ko man·enga indiba ian constituency-tangtango manderangna janggi tangani cholrangko on·na aro namroro silroroaniko ra·bana gita tangka paisarang chu·ongjaenga.
MLA scheme-ni tangka paisarang chu·ongjaenga ine janapatengon, ia scheme-ni tangka paisarangko bariatgenchimode ian MLA-rangna, an·tangtangni constituency-o dingtang dingtang kamrangko chu·sokate on·na dakchakani ong·gen ine Suin parakataha.
Mawsynram MLA-ni parakatani gitade, ua an·tangni kamko jako ra·chenga intalan an·tangni constituency-o Special Rural Works Program (SRWP)-ko maming dongnuani gri chu·sokate on·na a·bachengaha aro ia scheme-ni ning·o pilak proposal-rang aro namgniko man·enggipa manderangni bimingrangko ta·raken watataha.
Kamrangko chu·sokatanio, manderangna parake dakanian uni mongsonggipa daito ong·a ine janapatengon, ia scheme-na manderangko seokanioba ua darangnaba mikkang niteani grisa seokronga ine Suin aganaha.
Manderangni ka·donganiko man·na aro manderangna miksonge on·atgipa sorkarini tangka paisarangko name jakkalna gita pangnan parak ong·ani dongna nanga ineba ua aganaha.
