SHILLONG: Re·baenggipa 2028 bilsini Assembly election-o United Democratic Party (UDP)-ni dilgipa Paul Lyngdoh, National People’s Party (NPP)-ni tikitchi susaskana miksongenga ine jangbingbanganiko NPP-ni dilgiparang jegalataha.
Cabinet-oniko ra·gala man·ani ja·man UDP-ni dilgiparangko gisik sae, a·dokni gitcham Cabinet Minister aro UDP-ni MLA Paul Lyngdoh, 2028 bilsini Assembly election-o NPP-ni tikitchi susaskana nidingenga ine party-oni mitam kobor on·timgiparang parakatahachim.
Iani bidingo kobor ra·timgipa manderang baksa agangrikengon, UDP-ni MLA Paul Lyngdoh, NPP-o napskana miksongenga ine kobor on·anina NPP-ni state working president Hamletson Dohling, jagokmanpilaniko parakenba, ia kattarangara maming dakeba kakket ong·ani dongja ine talataniko on·angaha.
“Ian saniba chanchianisan ong·aia gita nika. Da·o dipet NPP-de Paul Lyngdoh-ni iandakgipa miksonganirangko knasoa dongkuja,” ine Dohling aganenba, Assembly election-na da·o bilsignimang dongkuengani gimin iandakgipa kamrangna agre seng·gnangdugakuenga ine parakataha.
Paul Lyngdoh, NPP-o napna miksongenga ine agananiara chanchichipe agananisan ong·aia aro da·o dipet iandakgipa kamrangni bidingo maming chanchirima dongkuja ineba ua aganaha.
UDP-ni saksa dilgipa Paul Lyngdoh-ko Cabinet-oniko ra·galaniara uni kamrangni gimin ong·ja indiba party-ko dilenggipa manderangni didiani giminsa ong·aha aro iani a·selan Lyngdoh, UDP-ni dilgiparangko gisik sae, 2028 bilsini Assembly election-ode NPP-ni tikitchi susaskana miksongenga ine UDP-oni mitam kobor on·timgiparang u·iatahachim.
UDP-ni gisepo Cabinet-ni biaprangko sualgrike ra·na songgigrikanirang dongachim ine party-ni mitam dilgiparang aganengon, Cabinet-ni biapko sualgrike ra·na gita ku·sikchi ba seachi maming songgigrikanirang dongja aro ian party-ko dilenggipa manderangni nangnikanisan ong·aia ine Lyngdoh aganskaaha.
Cabinet-ko gital dake sualpiltaiani ja·man September-ni 16 tariko gital minister-rangni ku·mikchetanio Lyngdoh bak ra·ejaha aro ian uni suk ong·nikgijaniko mesokaniba ong·ahachim.
NPP-chi dilenggipa Meghalaya Democratic Alliance (MDA)-II Cabinet-oniko ra·galani giminde gisik saja indiba ian mandeni chanchiani bewalosa pangchakaia ine adita salrangna skangsan, a·dokni gitcham Cabinet Minister aro UDP-ni MLA Paul Lyngdoh aganahachim.
Iani bidingo talataniko on·angengon, MDA-II Cabinet-ko sualpilna salbri skangsan UDP-ni foundation day-ko maniaha aro party-ni president an·tangan, Cabinet-ko sualpiltaina chanchia dongja ine media-na aganahani gimin ian maikai politics-o chanchianiko ja·rika, unosa pangchakaia ine Lyngdoh aganaha.
